როგორ აძლიერებს ჩინეთის ეკონომიკური შენელება აშშ-სთან ახალ სავაჭრო ომს? - ჩინეთის ექსპორტი თითქმის 24%-ით გაიზარდა, აშშ ჩინური საქონლის მესამე ქვეყნების გავლით შეტანის წინააღმდეგ ზომებს ამკაცრებს.
ჩინეთის შიდა ეკონომიკა სუსტ ნიშნებს აჩვენებს. მეორე კვარტალში GDP-ის ზრდა 4.3%-მდე შენელდა, საცალო გაყიდვები და ინვესტიციები სუსტია, ხოლო ივლისში სამომხმარებლო ინფლაციაც 0.5%-მდე შემცირდა. ამ ფონზე ექსპორტი საპირისპირო მიმართულებით მოძრაობს: ივლისში ჩინეთის ექსპორტი წლიურად 23.9%-ით გაიზარდა, ხოლო წლის პირველი შვიდი თვის სავაჭრო პროფიციტმა უკვე $687.4 მილიარდს მიაღწია.
აშშ-სთან კვეთა სწორედ აქ ჩნდება. მიუხედავად მაღალი ტარიფებისა და ტექნოლოგიური შეზღუდვებისა, ივლისში ჩინეთის ექსპორტი აშშ-ში 17%-ით გაიზარდა წინა წელთან შედარებით. ამავე დროს, ვაშინგტონი სულ უფრო მეტად ეჭვობს, რომ ჩინური საქონლის ნაწილი ამერიკულ ბაზარზე მესამე ქვეყნების გავლით შედის. თეთრი სახლის ბოლო შეფასებით, 40-ზე მეტი ქვეყანა შეიძლება გამოყენებული იყოს ჩინური პროდუქციის ტრანზიტისთვის, რათა ტარიფები თავიდან იქნეს აცილებული.
ამიტომ აშშ უკვე მხოლოდ უშუალოდ ჩინურ იმპორტს აღარ უყურებს. ვაშინგტონი ცდილობს გაამკაცროს საქონლის წარმოშობის წესები, აკონტროლოს მესამე ქვეყნებიდან რეექსპორტი და სავაჭრო შეთანხმებებში შეიტანოს მექანიზმები, რომლებიც ჩინური პროდუქციის სხვა ქვეყნის სახელით აშშ-ში შეტანას გაართულებს. Wall Street Journal-ის ინფორმაციით, აშშ-ის ხელისუფლება შესაძლო ტარიფებისგან თავის არიდებით დაკარგულ შემოსავლებს $19 მილიარდიდან $26 მილიარდამდე აფასებს.
ამ ყველაფრის ფონზე ჩნდება ე.წ. „China Shock 2.0“. განსხვავება ისაა, რომ ახლა ჩინეთი მსოფლიო ბაზარზე მხოლოდ იაფი სამომხმარებლო საქონლით აღარ ფართოვდება. ექსპორტის ახალი ტალღა ელექტრომობილებს, ბატარეებს, მზის ენერგიის ტექნოლოგიებს, ნახევარგამტარებსა და სხვა მაღალტექნოლოგიურ პროდუქტებს მოიცავს. Reuters-ის შეფასებით, ჩინეთის სუსტი შიდა მოთხოვნა კომპანიებს კიდევ უფრო აქტიურად უბიძგებს უცხოურ ბაზრებზე გასვლისკენ.
