2025 წლის 1 სექტემბრიდან ევროკავშირში ძალაში შევიდა აკრძალვა ტრიმეთილბენზოილ დიფენილფოსფინის ოქსიდის (TPO) შემცველი გელ-ლაქების გაყიდვასა და გამოყენებაზე. ეს ნივთიერება აღიარებულია, როგორც რეპროდუქციული ჯანმრთელობისთვის პოტენციურად საშიში – ამის შესახებ „ევროპულსი“ წერს.
ახალი წესები პირდაპირ გავლენას მოახდენს სილამაზის სალონებსა და მანიკურის სპეციალისტებზე. ისინი ვალდებულნი არიან, მიმოქცევიდან ამოიღონ აკრძალული კომპონენტის შემცველი ყველა პროდუქტი.
TPO არის მთავარი კომპონენტი, რომელიც პასუხისმგებელია გელის გამკვრივებაზე ულტრაიისფერი ნათურის ქვეშ. სწორედ ის უზრუნველყოფს საფარის გამძლეობას და ხანგრძლივობას.
მისი აკრძალვის გადაწყვეტილება მიღებული იქნა კვლევის მონაცემების საფუძველზე, რომლებმაც გამოავლინა ნივთიერების პოტენციური საფრთხე. მიუხედავად იმისა, რომ გამყარებულ მდგომარეობაში რისკი მინიმალურად ითვლება, ევროპელმა მარეგულირებლებმა მთლიანად აკრძალეს ნივთიერების გამოყენება კოსმეტიკაში.
