ერაყში მოქმედმა შეიარაღებულმა გაერთიანებამ, რომელიც საკუთარ თავს „ერაყის ისლამურ წინააღმდეგობას“ უწოდებს, აშშ-ის პრეზიდენტ დონალდ ტრამპის მკვლელობისთვის 10 მილიონი დოლარის ჯილდო გამოაცხადა.
ინფორმაცია ირანის სახელმწიფო სააგენტო IRNA-მ და რუსულმა სახელმწიფო მედიამ RT-მ გაავრცელეს. ჯგუფის განცხადება 16 ივლისით თარიღდება.
დაჯგუფების წარმომადგენლები გადაწყვეტილებას 2020 წელს ირანელი გენერლის, ყასემ სოლეიმანისა და ერაყელი სამხედრო მეთაურის, აბუ მაჰდი ალ-მუჰანდისის დაღუპვას უკავშირებენ. ორივე მათგანი ბაღდადის აეროპორტთან აშშ-ის მიერ განხორციელებული საჰაერო დარტყმის შედეგად დაიღუპა. ოპერაცია ტრამპის პირველი საპრეზიდენტო ვადის დროს ჩატარდა.
გავრცელებული განცხადების თანახმად, 10 მილიონი დოლარის გადახდას ჰპირდებიან პირს ან ორგანიზაციას, რომელიც ტრამპის წინააღმდეგ თავდასხმას განახორციელებს ან მას ხელს შეუწყობს.
ირანული Press TV-ის ცნობით, თანხა ერაყში მოქმედი შიიტური შეიარაღებული ჯგუფების წევრებისა და მათი მხარდამჭერების შემოწირულებებით შეგროვდა. ამ ინფორმაციის დამოუკიდებლად გადამოწმება ამ ეტაპზე შეუძლებელია.
„ერაყის ისლამური წინააღმდეგობა“ რამდენიმე პროირანული შეიარაღებული დაჯგუფების საერთო სახელწოდებაა. ამ გაერთიანებას წარსულში ერაყსა და სირიაში განთავსებულ ამერიკულ ძალებზე, ასევე ისრაელის მიმართულებით განხორციელებულ თავდასხმებს უკავშირებდნენ.
აშშ-ის ხელისუფლებას გავრცელებულ განცხადებაზე ოფიციალური პასუხი ჯერ არ გაუკეთებია. უცნობია ასევე, რა ზომებს მიიღებენ ამერიკული უსაფრთხოების სამსახურები ახალი მუქარის შემდეგ.
ტრამპისა და ირანის ურთიერთობები განსაკუთრებით 2020 წლის შემდეგ დაიძაბა. თეირანი უარყოფდა აშშ-ის წინა ბრალდებებს, რომ ირანის ხელისუფლება ამერიკის პრეზიდენტის წინააღმდეგ თავდასხმის ორგანიზებას ცდილობდა.
