2026 წლის მსოფლიო ჩემპიონატის გამარჯვებული გუნდი თასთან და ოქროს მედლებთან ერთად საჩემპიონო ბეჭდებსაც მიიღებს. მსგავსი ჯილდო FIFA-ს მიერ ორგანიზებულ ტურნირზე პირველად გაიცემა.
მსოფლიო ჩემპიონატის ფინალი 19 ივლისს, ნიუ-ჯერსიში გაიმართება, სადაც ერთმანეთს არგენტინა და ესპანეთი დაუპირისპირდებიან.
FIFA-ს გადაწყვეტილებით, ჩემპიონი გუნდისთვის 30 ინდივიდუალური ბეჭედი დამზადდება. თითოეული მათგანი ფეხბურთელის ან გუნდის წევრის თითის ზომაზე იქნება მორგებული და გამარჯვებული ნაკრების იდენტობის შესაბამის დიზაინს მიიღებს.
ბეჭდის ერთ მხარეს მსოფლიო ჩემპიონატის თასი იქნება გამოსახული, მეორე მხარეს კი ჩემპიონი გუნდის სიმბოლოები და ტურნირთან დაკავშირებული დეტალები განთავსდება. ყველა ბეჭედი ინდივიდუალურად დაინომრება და მას ნამდვილობის დამადასტურებელი სერტიფიკატი მოჰყვება.
ფინალის დასრულებისთანავე გამარჯვებული გუნდის კაპიტანსა და მთავარ მწვრთნელს დროებითი ბეჭდები გადაეცემათ. საბოლოო ვერსიების დამზადების შემდეგ კი 30 ბეჭედი გუნდს სპეციალურ ღონისძიებაზე გადაეცემა.
სულ 2 026 ბეჭედი დამზადდება. აქედან 30 მსოფლიო ჩემპიონი გუნდისთვის არის განკუთვნილი, დანარჩენი 1 996 კი FIFA-ს ოფიციალური არხებით გაიყიდება.
საჩემპიონო ბეჭდების ტრადიცია განსაკუთრებით გავრცელებულია ჩრდილოეთ ამერიკის სპორტში. მსგავსი ჯილდოები გამარჯვებულებს NFL-ში, NBA-ში, NHL-სა და ბეისბოლის უმაღლეს ლიგაში გადაეცემათ.
FIFA-ს ახალი გადაწყვეტილება 2026 წლის მსოფლიო ჩემპიონატში ამერიკული სპორტული კულტურის კიდევ ერთი ელემენტის დამატებად განიხილება. ტურნირზე უკვე დაინერგა რამდენიმე ახალი ფორმატი, მათ შორის ფინალური მატჩის გაფართოებული შოუ და წინასწარ განსაზღვრული ჰიდრატაციის შესვენებები.
მსოფლიო ჩემპიონატის გამარჯვებულისთვის საჩემპიონო ბეჭდების გადაცემა ერთჯერადი სიმბოლური ჟესტი არ იქნება. FIFA მას ტურნირის ისტორიისა და ჩემპიონი გუნდის წარმატებისადმი მიძღვნილ განსაკუთრებულ სამახსოვრო ჯილდოდ წარმოაჩენს.
