რუსეთის ოფიციალურმა უწყებამ, "როსკომნადზორმა", გამოაცხადა ეტაპობრივი შეზღუდვები შეტყობინებების სერვისის, WhatsApp-ის მიმართ. უწყების თანახმად, ეს სერვისი განაგრძობს რუსეთის კანონმდებლობის დარღვევას.
რუსეთმა აგვისტოში დაიწყო ზარების შეზღუდვა WhatsApp-ზე, რომელსაც ფლობს კომპანია Meta Platforms-ი, ასევე Telegram-ზე - და ამ უცხოურ კომპანიებს ბრალი დასდო, რომ ისინი სამართალდამცავებს არ უზიარებენ ინფორმაციას თაღლითობის და ტერორიზმის საქმეებში, იუწყება სააგენტო "როიტერსი".
28 აგვისტოს უწყებამ ეს სერვისი კიდევ ერთხელ დაადანაშაულა დანაშაულის აღკვეთისა და მასთან ბრძოლის წესების შეუსრულებლობაში.
"თუ მესიჯების ეს სერვისი გააგრძელებს რუსეთის კანონმდებლობის მოთხოვნების არშესრულებას, ის სრულად დაიბლოკება", - აცხადებს უწყება. მის განცხადებას ავრცელებს სააგენტო "ინტერფაქსი".
WhatsApp-ი მოსკოვს ადანაშაულებს მილიონობით რუსისთვის უსაფრთხო კომუნიკაციის ბლოკირების მცდელობაში.
რუსეთის ხელისუფლება ცდილობს გაავრცელოს სახელმწიფოს მიერ მხარდაჭერილი მეტოქე აპლიკაცია MAX-ი - რომელიც, კრიტიკოსების თქმით, მომხმარებლის მეთვალყურეობისთვის შეიძლება იყოს გამოყენებული. სახელმწიფო მედია ამ ბრალდებებს უარყოფს.
