ეკონომიკის სამინისტროს კავშირგაბმულობის, საინფორმაციო და თანამედროვე ტექნოლოგიების დეპარტამენტის უფროსის ეკა ყუბუსიძის განცხადებით, პროექტ Log-In Georgia-ს ფარგლებში ინტერნეტიზაციის სახელმწიფო პროგრამა აქტიურ ფაზაშია. როგორც მან პარლამენტში საგარეო ურთიერთობათა კომიტეტში განაცხადა, პროექტი 2020 წლიდან ხორციელდება და მიმდინარე და დასრულებული ფართოზოლოვანი ქსელის მშენებლობის მოცულობა 1 710 კილომეტრს შეადგენს.

„Log-In Georgia-ს ფარგლებში ინტერნეტიზაციის სახელმწიფო პროგრამა არის აქტიურ ფაზაში. დღეისათვის განხორციელდა 550 კილომეტრი ოპტიკურ-ბოჭკოვანი ინფრასტრუქტურის მშენებლობა. ამავდროულად მიმდინარეობს კიდევ 220 კილომეტრის მშენებლობა ქობულეთი-ხელვაჩაურის და რაჭის დარჩენილ მონაკვეთებზე, რომელიც 2023 წლის ივლისში, მაქსიმუმ აგვისტოში უნდა დასრულდეს.

ამის პარალელურად გაფორმებულია კიდევ ორი შეთანხმება, მესტია-ჯვარის და ზუგდიდი-ხობის მონაკვეთზე. ერთი არის 160 კილომეტრი, მეორე არის 270 კილომეტრის სიგრძის, სადაც ამჟამად მიმდინარეობს პროექტირება და აღნიშნულის მშენებლობა დასრულდება 2024 წლის იანვრისთვის.

ამავდროულად გამოცხადებულია კიდევ ორი ტენდერი, აბაშა-სენაკის და წყალტუბო- ვარციხის მონაკვეთებზე. მთლიანობაში მიმდინარე და დასრულებული მშენებლობის მოცულობა შეადგენს 1 710 კილომეტრს“,-განმარტავს ეკა ყუბისიძე.

აღსანიშნია, რომ საქართველოსა და რეკონსტრუქციისა და განვითარების საერთაშორისო ბანკს შორის 2020 წლის 31 აგვისტოს ხელმოწერილი სასესხო შეთანხმების მიხედვით, პროექტ Log-In Georgia-ს განსახორციელებლად ბანკმა საქართველოს სესხის სახით 25 წლის ვადით 35,7 მლნ ევრო გამოუყო.

გარდა ამისა, 2021 წლის 25 ნოემბერს ხელი მოეწერა ევროპის საინვესტიციო ბანკთან ხელშეკრულებას [ბოჭკოვანი ქსელი საქართველოს სოფლებისთვის], რომლის ფარგლებში დონორმა საქართველოს პროექტისთვის 34 მლნ ევრო გამოუყო.

გეგმის მიხედვით, ინტერნეტიზაციის სახელმწიფო პროგრამა 2025 წლის 31 დეკემბრამდე უნდა დასრულდეს. პროექტს ააიპ ოუფენ ნეტი ახორციელებს.

bm.ge