ევროკავშირში ყველა ახალი ავტომობილი ალკოზამკის დასაყენებლად მზად უნდა იყოს.
ევროკავშირში ახალი ავტომობილების უსაფრთხოების მოთხოვნები კიდევ უფრო მკაცრდება. უახლოეს წლებში ყველა ახალი ავტომობილი ტექნიკურად მზად უნდა იყოს სპეციალური ალკოზამკის (Alcohol Interlock) სისტემის დასაყენებლად, რომელიც მძღოლის სიმთვრალეს ამოწმებს და საჭიროების შემთხვევაში ავტომობილის დაქოქვას ბლოკავს.
ალკოზამკა მოწყობილობაა, რომელიც ავტომობილის ამუშავებამდე მძღოლს სთხოვს სპეციალურ სენსორში ჩაბერვას. თუ ალკოჰოლის დონე დასაშვებ ნორმას აღემატება, ძრავა არ ჩაირთვება.
ევროკავშირის რეგულაციის თანახმად, ახალი ავტომობილები უკვე უნდა იყოს აღჭურვილი სპეციალური ინტერფეისით, რომელიც მსგავსი სისტემის სწრაფად და დამატებითი ტექნიკური ცვლილებების გარეშე დაყენების შესაძლებლობას იძლევა. ეს არ ნიშნავს, რომ ყველა მანქანაში ალკოზამკა სავალდებულოდ დამონტაჟდება, თუმცა ავტომწარმოებლები ვალდებულნი არიან მანქანები ასეთი ტექნოლოგიისთვის წინასწარ მოამზადონ.
ევროკავშირის მიზანია საგზაო უსაფრთხოების გაუმჯობესება და ალკოჰოლის ზემოქმედების ქვეშ მართვასთან დაკავშირებული ავარიების შემცირება. ევროკომისიის მონაცემებით, ნასვამ მდგომარეობაში ავტომობილის მართვა კვლავ რჩება ავტოსაგზაო შემთხვევების ერთ-ერთ მთავარ მიზეზად.
ალკოზამკის ტექნოლოგია უკვე გამოიყენება რამდენიმე ევროპულ ქვეყანაში. ზოგიერთ შემთხვევაში მისი დაყენება სასამართლოს გადაწყვეტილებით იმ მძღოლებს ევალებათ, რომლებიც ნასვამ მდგომარეობაში მართვისთვის არიან დაჯარიმებული ან მსჯავრდებული.
ექსპერტების შეფასებით, მსგავსი სისტემების ფართოდ დანერგვამ შესაძლოა მნიშვნელოვნად შეამციროს მძიმე ავარიებისა და საგზაო შემთხვევების რაოდენობა, განსაკუთრებით იმ ქვეყნებში, სადაც ალკოჰოლთან დაკავშირებული დარღვევები კვლავ სერიოზულ პრობლემად რჩება.
