თავდაცვის უწყების ყოფილი თანამშრომელი გიორგი შაიშმელაშვილი რაჭაში განვითარებულ სტიქიას ეხმაურება და სამაშველო სისტემის შესახებ სოციალურ ქსელში წერს.
მისი თქმით, 2016 წელს საქართველოს მთავრობამ 2 სამაშველო ვერტმფრენის ყიდვის განკარგულება გააუქმა.
,,რას ვგულისხმობ, როცა ვსაუბრობ რომ ელემენტარული სტაბილურობისა და განგრძობითობის გარეშე განვითარება ვერ იქნება.
მაგალითად 2015 წლის 11 დეკემბერს საქართველოს მთავრობა განკარგულებას გამოსცემს და გადაწყვეტს ამერიკული გრანტის ფარგლებში შეიძინოს ორი ვერტმფრენი. ანუ ფაქტობრივად ამერიკელები გვჩუქნიან ორ ვერტმფრენს. საუბარია შეიარაღებულ ძალებში დღეს არსებული იროკეზების გაუმჯობესებულ ვარიანტზე.დეტალები, იხილეთ ლინკზე კომენტარებში.
2016 წლის 16 ნოემბერს, საქართველოს მთავრობა ახალი განკარგულებით აუქმებს ამ გადაწყვეტილებას და კარგა გვარიანი ჯარიმის გადახდაც უწევს მომწოდებლისთვის. ალბათ იფიქრებთ რა მოხდა არასრულ ერთ წელიწადში, არაფერი, მინისტრი ხიდაშელი ჩაანაცვლა მინისტრმა იზორიამ.
დღეს არც ერთ ეთერში არ მითქვამს, ამ საკითხზე არაფერი, სანამ დამადასტურებელი დოკუმენტები ღია წყაროებში არ ვიპოვე, ვინმეს რომ არ ეფიქრა რამეს ვიგონებდი. რადგან 2016 წლის ნოემბერში უკვე მომხდარია ვერეს ხეობის ტრაგედია და ამ ფონზე ძნელი დასაჯერებელია ვინმეს შეეჩერებინა ვერტმფრენების შესყიდვა, მით უფრო ამერიკული გრანტით. ჰკითხეთ იზორიას",- წერს გიორგი შაიშმელაშვილი.
