სომხეთის მთავრობის გადაწყვეტილებით, ქვეყნის საზღვრების გადაკვეთის დამადასტურებელ შტამპზე აღარ იქნება არარატის მთის გამოსახულება.

როგორც რადიო თავისუფლების სომხური სამსახური წერს, 2025 წლის 1 ნოემბრიდან შტამპზე იქნება მხოლოდ წარწერა „სომხეთი“ სომხურ და ინგლისურ ენებზე, გამშვები პუნქტის სახეობა და დასახელება და საზღვრის გადაკვეთის დრო.

მთა არარატი, რომელიც სომხეთის ეროვნულ სიმბოლოდ ითვლება და ქვეყნის გერბზეცაა გამოსახული, თურქეთის ტერიტორიაზე მდებარეობს. ბოლო ხანს ერევანი და ანკარა ურთიერთობების გაუმჯობესებას ცდილობენ.

სომხეთის ოპოზიციამ მთავრობა გააკრიტიკა საზღვრის გადაკვეთის დამადასტურებელი შტამპიდან არარატის ამოღების გამო. სომხეთის შრომის და სოციალურ საკითხთა მინისტრმა კი განაცხადა, რომ გადაწყვეტილება მიღებულია საზღვრების გადაკვეთის თანამედროვე მოთხოვნებისა და „რეალური სომხეთის იდეოლოგიის“ შესაბამისად.