„ევროპელი ინვესტორები ადგებიან და უკან წაიღებენ ინვესტიციებს, ისედაც ბოლო წვეთამდე იყვნენ მისული“, - ამის შესახებ დეველოპერული კომპანია „არსის“ დამფუძნებელმა ირაკლი როსტომაშვილმა „ბიზნესპრესნიუსთან“ განაცხადა.
მისი თქმით, მთავრობის გადაწყვეტილება, რომ 2028 წლამდე ევროკავშირში გაწევრიანების შეახებ მოლაპარაკებების გახსნის საკითხს დღის წესრიგში არ დააყენებს, ევროკავშირზე პირდაპირ უარის თქმას ნიშნავს.
„მთავრობის ამ გადაწყვეტილების შემდეგ, ძალიან ბევრი ჩემი გეგმა ყირაზე დადგა და რა თქმა უნდა, ამ ნაბიჯს უარყოფითად ვაფასებ. კონსტიტუციის 78-ე მუხლში წერია, რომ მთავრობამ ევროატლანტიკურ სტრუქტურებში ინტეგრაციისთვის ყველაფერი უნდა გააკეთოს. ვერ დავეთანხმები ამას და ჩემთვის ეს ევროკავშირზე პირდაპირ უარის თქმაა. ეს სხვანაირად როგორ უნდა გავიგოთ.
მე მყავს სერიოზული ევროპელი პარტნიორები, რომლებმაც ვერც გაიგეს, რა მოხდა. ცხადია, რომ ისინი აქ ინვესტირებულ თანხებს უკან წაიღებენ. ისედაც ბოლო წვეთამდე იყვნენ მისული. ევროკავშირის დროშა რომ დაწვეს საქართველოში და ხდებოდა ასეთი ფაქტები, ვამშვიდებდი მათ, მაგრამ ახლა პირდაპირ ითქვა, რომ უარს ამბობენ 2028 წლამდე მოლაპარაკების დაწყებაზე.
ევროპელი ინვესტორი აქ შემოსვლას რომ ფიქრობს, თავისი ქვეყნის საელჩოებში ეკონომიკურ ატაშეებს ეკითხება აზრს. ისინი მათ უგზავნიან ინფორმაციას, ეკონომიკურ ანალიზს და ა.შ. ახლა ნებისმიერი ინვესტორი რომ დარეკავს საელჩოში და ეტყვის მათ, საქართველოში მსურს ინვესტიცია განვახორციელოო, ისინი ჰკითხავენ, „ხომ ხარ სრულ ჭკუაზე?“-ო. ეტყვიან, რომ გვაქვს ასეთი პრობლემა, რომ ევროკავშირის მიმართ მთავრობას აგრესიული დამოკიდებულება აქვს“, - აღნიშნა ირაკლი როსტომაშვილმა.
წყარო: bpn.ge
შეგახსენებთ, მეორე დღეა საქართველოს პარლამენტთან ევროინტეგრაციის მხარდამჭერი აქცია მიმდინარეობს. დემონსტრანტები აპროტესტებს მთავრობის გადაწყვეტილებას, 2028 წლის ბოლომდე მოხსნან დღის წესრიგიდან საქართველოს ევროკავშირში გაწევრებაზე მოლაპარაკებების დაწყება.
შეგახსენებთ, მეორე დღეა, საქართველოს პარლამენტთან ევროინტეგრაციის მხარდამჭერი აქცია მიმდინარეობს. დემონსტრანტები აპროტესტებს მთავრობის გადაწყვეტილებას, 2028 წლის ბოლომდე მოხსნან დღის წესრიგიდან საქართველოს ევროკავშირში გაწევრებაზე მოლაპარაკებების დაწყება.
შინაგან საქმეთა სამინისტროს ცნობით, 29-30 ნოემბრის საპროტესტო აქციის დროს, სამართალდამცველთა მიერ პოლიციელის კანონიერი მოთხოვნისადმი დაუმორჩილებლობისა და წვრილმანი ხულიგნობისთვის 107 პირია დაკავებული. ანუ უწყებამ ერთ ღამეში 107 ადამიანი დააკავა. მათივე ინფორმაციით, დაშავებულია შინაგან საქმეთა სამინისტროს 10 თანამშრომელი.
მიმდინარე პროცესებისგან დისტანცირებისა და პროტესტის ნიშნად სამსახურები დატოვეს: ეროვნული ბანკის ასეულობით თანამშრომელმა, იუსტიციის სახლის ათეულობით და საგარეო საქმეთა სამინისტროების ასეულობით თანამშრომელმა, პროსახელისუფლებო მედიის რამდენიმე ჟურნალისტმა. პოსტები დატოვეს და "ქართული ოცნების" ანტიევროპულ პოლიტიკას გაემიჯნენ ქართველი დიპლომატები, ელჩები.
ძალადობა დაგმო და ქართველ ხალხს თანადგომა გამოუცხადა სპორტსმენების ნაწილმა. პროტესტის ნიშნად დაიხურა რამდენიმე რესტორანი. გაკვეთილის ჩატარებაზე უარი თქვა რამდენიმე პედაგოგმა.
ხელისუფლების გადაწყვეტილება დაგმო სხვადასხვა დარგობრივმა ბიზნესგაერთიანებებმა და ასოციაციებმა.
სპექტაკლები გააუქმეს ან გადადეს თეატრებმა.
