EastFruit-ის ანალიტიკოსების აზრით, 2023 წელს თურქეთში კარტოფილის წარმოების მკვეთრი ზრდაა მოსალოდნელი, რაც ქართველი კარტოფილის მწარმოებლებისთვის არასახარბიელო ამბავია. დაბალი ფასის გამო, იმპორტის ზეწოლა ადგილობრივ წარმოების გაყიდვებზე, შესაძლოა, ახალ სეზონზე, ჩვეულებრივზე მეტიც იყოს.
ამ მოლოდინებს ადასტურებს თურქეთში სათესლე კარტოფილის იმპორტის სტატისტიკა. 2023 წლის პირველ ოთხ თვეში ქვეყანამ 28,5 ათასი ტონა სათესლე კარტოფილი შეიძინა, რაც იმპორტის ისტორიაში ახალი რეკორდია. ეს მაჩვენებელი 2022 წლის იმავე პერიოდის იმპორტის მოცულობაზე 91%-ით მეტია.
თურქეთში იმპორტირებული სათესლე კარტოფილის 79% ნიდერლანდებიდანაა, 7%- დიდი ბრიტანეთიდან, 6%- საფრანგეთიდან, 4%- გერმანიიდან და 2%- ბელგიიდან.
წარმოების ასეთი მკვეთრი ზრდა, რეგიონში კარტოფილზე ფასის მატებითაა გამოწვეული. კარტოფილზე შიდა ფასების სწრაფი ზრდის გამო, თურქეთის მთავრობამ 2023 წლის დასაწყისში მისი ექსპორტი აკრძალა. ექსპორტის აკრძალვა ეხებოდა ხახვსაც, რომელიც ასევე ძალიან ძვირი ღირდა. შედეგად, 2023 წლის იანვარ-აპრილში თურქეთიდან კარტოფილის ექსპორტმა 13 000 ტონაზე ნაკლები შეადგინა, ხოლო ერთი წლის წინ ამავე პერიოდში 113 000 ტონა იყო ექსპორტირებული.
აღსანიშნავია, რომ 2021 წელს თურქეთიდან კარტოფილის ექსპორტმა 265 000 ტონას მიაღწია, რაც რეკორდული მოცულობა იყო. თურქული კარტოფილის ძირითადი ბაზრებია სირია, ერაყი, არაბეთის გაერთიანებული საამიროები, საქართველო, აზერბაიჯანი, კატარი, ომანი და თურქმენეთი.
2023 წელს თურქეთში კარტოფილის ძალიან მაღალი წარმოების პერსპექტივის გათვალისწინებით, ამ პროდუქტზე ფასების მნიშვნელოვანი შემცირება უნდა მოხდეს. აქედან გამომდინარე, ექსპორტის გეოგრაფია, სავარაუდოდ, მნიშვნელოვნად გაფართოვდება.
აქვე უნდა აღინიშნოს, რომ ლირის ბოლოდროინდელმა გაუფასურებამ შესაძლოა თურქეთიდან კარტოფილის ექსპორტს კიდევ უფრო შეუწყოს ხელი.
