კარტოფილზე ფასების ზრდა საქართველოში უახლოეს მომავალში ნაკლებად სავარაუდოა. მაისი გარდამავალი პერიოდია, როდესაც ქართული ბაზარი წინა წლის მოსავლიდან „ახალ კარტოფილზე“ გადადის. კარტოფილის ფასი ხანდახან მაშინ იზრდება, როცა სამცხე-ჯავახეთის რეგიონში შემოდგომის მოსავალი გაზაფხულამდე ვერ აღწევს. 2022 წელს ამ რეგიონში დიდი მოსავალი არ იყო, მაგრამ ფასები კარტოფილზე სტაბილური დარჩა, ამის შესახებ EastFruit-ის ანალიტიკოსები წერენ.
შარშანდელი კარტოფილის საშუალო ფასი საქართველოს საბითუმო ბაზარზე დაახლოებით $0,67-ა ( 1.70 ლარი) კგ-ზე და ზრდის ტენდენციას არ აჩვენებს, რადგან ფასებიც და კარტოფილის იმპორტიც მაღალ ნიშნულზეა.
2022 წელს სამცხე-ჯავახეთში ცუდი მოსავლის გამო, ოქტომბერში კარტოფილის ფასი გაიზარდა. მას შემდეგ საშუალო ფასი სტაბილურია. EastFruit-ის ანალიტიკოსები მიიჩნევენ, რომ ფასების კიდევ უფრო მეტად გაზრდა პრობლემური იქნება ქართველი მომხმარებლისთვის, რადგან კარტოფილი ისედაც საკმაოდ ძვირია.
2022 წლის ოქტომბრიდან 2023 წლის აპრილის ბოლომდე ქვეყანამ 27 000 ტონაზე მეტი კარტოფილი შემოიტანა, რაც იმპორტის მოცულობის ყველაზე მაღალი მაჩვენებელია 2015 წლის შემდეგ. წინა ცხრა სეზონზე იმპორტის საშუალო მოცულობა 12 000 ტონა იყო. EastFruit წერს, რომ გაზრდილი იმპორტის გარეშე კარტოფილი ძალიან გაძვირდებოდა, განსაკუთრებით გარდამავალ პერიოდში.
ამჟამად ქვეყნები საიდანაც საქართველოში კარტოფილის ძირითადი იმპორტი ხდება რუსეთი და ბელარუსია, თუმცა შესაძლოა ამ რიგებში თურქეთიც დაბრუნდეს. ადრე თურქეთი მთავარი იმპორტიორი იყო და ზღუდავდა ექსპორტს ინფლაციის წინააღმდეგ საბრძოლველად. თურქეთში ინფლაცია ჯერ კიდევ მაღალია, თუმცა თურქეთში კარტოფილის ადრეული მოსავალიც დიდია (TurkiyeGazetesi) და შესაძლოა ეს აღმოჩნდეს სტიმული ექსპორტისთვის, მათ შორის საქართველოშიც. AgroPrice.net-ის ცნობით, სტამბოლში საშუალო საბითუმო ფასი ამჟამად 0,34 დოლარია კგ-ზე.
