„ჩვენ ვაფორმებთ სტრატეგიულ თანამშრომლობას ჩინეთთან და ამის პარალელურად, ვაუქმებთ აშშ-სთან და ევროკავშირთან, რაც სტრატეგიულად ჩვენთვის უფრო ხელსაყრელია“ - ასე ეხმაურება რადიოგადაცემაში „საქმე“კვლევითი ცენტრ „ჯეოქეისის“ მრჩეველთა საბჭოს წევრი ნიკოლოზ ალავიძე საქართველო-ჩინეთს შორის ბოლო პერიოდში გაფორმებულ არაერთ შეთანხმებას, მათ შორის, საბანკო სექტორში.
„საქართველოსა და ჩინეთს შორის საგარეო ვაჭრობის მაჩვენებელი მილიარდ დოლარს სცდება. რა თქმა უნდა, აქ ვაჭრობა დეფიციტური გვაქვს, მაგრამ ეს ახალი არაა, რადგან მთელ კაცობრიობას აქვს ჩინეთთან ასეთი დეფიციტი. ზოგადად ჩინეთთან ურთიერთობას ცალკე აღებულს, რაღაც რისკის დაზღვევად არ განვიხილავდი, ეს ნებისმიერ კონტექსტში დიდი სურათის ნაწილად უნდა იყოს განხილული. ჩვენი პატარა ეკონომიკაა, პატარა ქვეყანაა, რომელიც თავისი გეოპოლიტიკით და საზღვაო ხელმისაწვდომით, რომ მოვისმინოთ, ყველაფრის ჰაბი ვართ. მნიშვნელოვანია, უფრო დაფიქრებული ნაბიჯები გადავდგათ ჩინეთთან მიმართებით.
საყურადღებოდ შევაფასებდი, 2023 წლიდან ჩინეთთან სტრატეგიული თანამშრომლობაზე გადასვლას. ანუ ჩვენ ვაფორმებთ სტრატეგიულ თანამშრომლობას ჩინეთთან და ამის პარალელურად, აშშ-სთან და ევროკავშირთან ვაუქმებთ, რომელიც სტრატეგიულად ჩვენთვის უფრო ხელსაყრელია. ასეთ დროს ჩვენ რაღაც ხისტ ნაბიჯებს ვდგამთ, არ ვაზღვევთ რისკებს.
თუ განვიხილავთ ჩინეთთან ურთიერთობას, თუნდაც საბანკო ნაწილში, არის მკვეთრად გამოკვეთილი ქეისები. არის 4 უმსხვილესი ჩინური ბანკი, რომელიც მთლიანად იმართება სახელმწიფო ინტერესებიდან გამომდინარე. თუ ჩვენი ქვეყანა მზად არის თავი დაიზღვიოს და მაღალკვალიფიციური იურიდიული მომსახურება გაწიოს ჩინეთის ტერიტორიაზე, იმ შემთხვევაში, თუ რაიმე სადაო გახდება, რა თქმა უნდა, კარგია ასეთი ურთიერთიერთობა ჩინურ საფინანსო სექტორთან“, - განაცხადა ალავიძემ.
შეგახსენებთ, რომ საქართველოს ეროვნულ ბანკსა და ჩინეთის ცენტრალურ ბანკს შორის ურთიერთგაგების მემორანდუმს ხელი მოეწერა. სებ-ის ცნობით, მემორანდუმით მხარეები თანხმდებიან ორი ქვეყნის ცენტრალურ ბანკებს შორის მონეტარული პოლიტიკის სფეროში თანამშრომლობაზე, ასევე ფინანსური ტექნოლოგიების, საგადახდო სისტემებისა და ფასიანი ქაღალდების ბაზრის განვითარების სფეროებში ინფორმაციისა და გამოცდილების გაზიარებას.
წყარო: bpn.ge
