საქართველოში შემოსული ავტომობილების ნაწილი გასაყიდი რჩება. ამის მიზეზი უცხოელი დილერები არიან, რომლებიც თავიანთი ქვეყნებიდან ავტომობილებს ყიდულობენ და საქართველოდან რეექსპორტზე გაჰყავთ. შედეგად, უცხოელები ქართველებს დიდ კონკურენციას უქმნიან, რის მოგვარებასაც ადგილობრივი ავტოიმპორტიორები ითხოვენ.
საქართველოს ადგილობრივ ბაზარზე კონკურენცია გაიზარდა. კერძოდ, ქართველ ლიდერებთან კონკურენციაში შემოდიან ყირგიზი, ყაზახი და ტაჯიკი დილერები, რომლებიც თავად ახორციელებენ ექსპორტს საქართველოს გავლით.
ავტოინდუსტრიაში შექმნილ პრობლემაზე ისაუბრა 'რობანი მოტორსის" ხელმძღვანელმა ელგუჯა ჯამაგიძემ და განაცხადა, რომ ქართული რგოლი იკარგება.
„ამ პრობლემის მოგვარებაზე ალექსი ნონიაიძესთან (ავტოიმპორტიორთა ასოციაციის ხელმძღვანელი) ერთად ვმუშაობთ. ასოციაცის ძალიან დაინტერესებულია საკითხის მოგვარებით და შესაბამისად კომუნიკაცია აქტიურია. მათი ეგიდით კომუნიკაცია გვაქვს დილერებთანაც.
დღევანდელ პერიოდში ეს ძალიან პრობლემატური საკითხია ავტობიზნესში, რადგან ყაზახი, ყირგიზი, და უკვე ტაჯიკი ავტოდილერებიც გამოჩნდნენ, შემოდიან საქართველოში, თავიანთ სახელზე რეგისტრირებული სხვადასხვა კომპანიების დახმარებით ყიდულობენ ავტომობილებს და ქართველი დილერების გვერდის ავლით რეექსპორტს ახდენენ. შესაბამისად, ქართული რგოლი, რა მხრივაც ჰაბად ვიყავით ქცეული და ყველა ცდილობდა, რომ ქართველი დილერებისგან ეყიდა მანქანა, იკარგება და ქართველი დილერები დარჩნენ გვერდით.
შემოსავლების სამსახურთან გვქონდა კომუნიკაცია, რა დროსაც კანონიერ შეზღუდვებზე იყო საუბარი, რომელსაც არარეზიდენტი პირები ახორციელებენ ჩვენს ტერიტორიაზე. მაშინ, კონკრეტულ შეთანხმებამდე მივედით, რომ უნდა დანერგილიყო ღონისძიებები, რომელიც მაგალითად კონკურენტუნარიან ვითარებაში მოიყვანდა ქართველ დილერებთან ერთად და არა ისე, უკონკურენტოდ, ყველაფრის გარეშე, როგორც ფუნქციონირებენ.
შემდგომ, შემოსავლების სამსახურის ხელმძღვანელობა შეიცვალა, დაჩი ბერაია მოვიდა, ძალიან გულისხმიერი და კარგი ადამიანი და მასთანაც მოგვიწია შეხვედრა. ძველ გადაწყვეტილებებზე თავი შეიკავეს, არ ვიცი რატომ, მაგრამ მათი ხედვა ასეთი იყო. ჩვენგან იყო მითითება და თხოვნა, თუ როგორ შეიძლება პრობლემის გადაჭრა და მივედით იქამდე, რომ არარეზიდენტპირებთან დაკავშირებით კანონის აღსრულების პირობა მივიღეთ. ვფიქრობთ, რომ მათი დახმარებით მოხდება დილერების იმ ჩარჩოში მოქცევა, რა ჩარჩოშიც ნებისმიერი არერეზიდენტი პირი უნდა იყოს მოქცეული. ალბათ, მივალთ იქამდე, რომ რაღაც შედეგი იქნება, მაგრამ მეორე ვარიანტი ის არის, რომ გარკვეულწილად ტრანზიტის დღეები გადაიხედოს და შემცირდეს. მათი მხრიდან ტრანზიტი არ უნდა იყოს მოქცეული 30 და მეტ დღეზე, რადგან ამ პერიოდში ისინი დაზიანებულ ავტომობილებს აკეთებენ და თავიანთ მომხმარებლებს აქედანვე სთავაზობენ ტრანსპორტს. იმას, რასაც აკეთებდა ქართველი დილერი, ახლა აკეთებენ არარეზიდენტები, უკანონო მეწარმეები, უცხო ქვეყნის მოქლაქეები", - განუცხადა „რეზონანსს" ელგუჯა ჯამაგიძემ და იმ სქემზე ისაუბრა, რისი მეშვეობითაც უცხოელები ავტომობილებს ყიდიან.
„მოგეხსენებათ, რომ ჩვენ სტუმართ-მოყვარე ხალხი ვართ. თავიდან ზოგიერთმა თავისთვის იყიდა ავტომობილი. შემდეგ ნახა, რომ ავტმობილის გაყიდვა მარტივია, გააგზავნა თავის ქვეყანაში და ასე გააქტიურდა. ასეთმა მოცემულობამ ნელ-ნელა გამოიწვია ის, რომ ფეხი მოიკიდეს საქართველოში და რუსთავის ბაზრობაზე რომ გახვიდეთ, ძალიან ბევრ უცხოელს ნახავთ.
თაღლითური სქემებიც აქვთ, რომლებიც ჩვენ შევისწალეთ. მაგალითად, არის შემთხვევები, როდესაც უცხოელები მიდიან ქართველ დილერებთან, უტოვებენ ბეს და ეუბნებიან, რომ ავტომობილის კლიენტს მოუყვანენ. ასე ხდება დღის განმავლობაში, 3-4 მანქანას იბევებენ და შესაბამისად ქართველი დილერი ვეღარ ყიდის ავტომობილს, რადგან ბე აქვს აღებული. შემდეგ ხდება ასეთი რამ, კლიენტი როდესაც მიდის ბაზარზე ავტობომილის შესაძენად, უცხოელი აჩვენებს ამ ავტომობილებს და მათ შორის თავისასაც. მყიდველს საკუთარ ავტომობილის მიყიდის იმ ფასში, რა ფასშიც აწყობს და დაბევებული მანქანის მფლობელებს კი ეუბნება, რომ არ გამოჩნდა კლიენტი და უკან ითხოვს დატოვებულ ბეს, წინააღმდეგ შემთხვევაში, პოლიციას იძახებს. ასეთი თაღლითური სქემა მრავალია მათი მხრიდან", - დასძინა ელგუჯა ჯამაგიძემ „რეზონანსთან".
შექმნილ ვითარებაში და გაზრდილი კონკურენციის პირობებში ქართველი დილერების გაყიდვები, ფასები და მოგება შემცირებულია. მიუხედავად იმისა, რომ იზრდება იმპორტ-ექსპორტი, ქართველი ავტოდილერები ადგილობრივ ბაზარზე არსებულ პრობლემებზე აქტიურად საუბრობენ.
„ადგილობრივი ბაზარზე მონაწილეების რაოდენობა და კონკურენცია გაიზარდა და ქართველი დილერი მძიმე მდგომარეობაშია. მათი გაყიდვების რაოდენობა მცირდება, მოგებაც მცირდება. ფაქტობრივად, თვითღირებულების ტოლფასია და მოგების მარჟა მინიმალურია. ზოგადი მაჩვენებლებით გვაქვს წინსვლა, მაგრამ რეალური მდგომარეობა რადიკალურად განსხვავებულია, იმიტომ, რომ ძალიან დიდ კონკურენციას უწევენ ადგილობრივ დილერებს ყირგიზი და ყაზახი დილერი", - განაცხადა ავტოიმპორტიორთა ასოციაციის ხელმძღვანელმა ალექსი ნონიაძემ „ბიზნესპრესნიუსთან".
