ჩინეთში არ გამორიცხავენ, რომ შეერთებული შტატების წინააღმდეგ მსოფლიო სავაჭრო ორგანიზაციას (WTO-ს) საჩივრით მიმართონ. პეკინში ამბობენ, რომ ეს იქნება საპასუხო ზომა მისი უფლებებისა და ინტერესების დასაცავად. ოფიციალური პეკინის განცხადებით, შეერთებული შტატების მიერ მოვალეობების ცალმხრივი შემოღება WTO-ს წესების უხეში დარღვევაა. მას შემდეგ, რაც ამერიკის შეერთებულმა შტატებმა ჩინეთიდან ყველა საქონელზე ტარიფები გაზარდა, პეკინი ვაშინგტონს სავაჭრო ომის რისკის შესახებ აფრთხილებს. კვირას, 2 თებერვალს, ჩინეთის საგარეო საქმეთა სამინისტრომ განცხადება გაავრცელა, სადაც ხაზგასმულია, რომ სავაჭრო და საბაჟო ომში გამარჯვებულები არ არიან.
„გადასახადების დამატებითი 10%-იანი ზრდა აუცილებლად იმოქმედებს ქვეყნებს შორის ორმხრივ თანამშრომლობაზე ნარკოტრეფიკის წინააღმდეგ ბრძოლაში და ზიანს მიაყენებს მას.“ - ნათქვამია სამინისტროს განცხადებაში.
მანამდე, ჩინეთის ვაჭრობის სამინისტრომ მკაცრად დაგმო აშშ-ს ადმინისტრაციის წინა დღით მიღებული გადაწყვეტილებები. პეკინის განცხადებაში ნათქვამია, რომ ჩინეთისთვის "კატეგორიულად მიუღებელია ახალი ტარიფები" და მიიღებს "შესაბამის კონტრზომებს", რათა "მტკიცედ დაიცვას თავისი უფლებები და ინტერესები". ჩინური გამოცემა Xinhua-ს ცნობით, ჩინეთის წამყვანი ბიზნესმენები „გამოთქვამენ ღრმა სინანულს და კატეგორიულად ეწინააღმდეგებიან აშშ-ს გადაწყვეტილებას დამატებითი საბაჟო გადასახადების დაწესების შესახებ“.
ჩინეთის საერთაშორისო ვაჭრობის ხელშეწყობის საბჭოს სპიკერის განცხადებით, შეერთებული შტატების მიერ დამატებითი ტარიფების ცალმხრივი დაწესება სერიოზულად არღვევს მსოფლიო სავაჭრო ორგანიზაციის წესებს, რისთვისაც "ბევრი ამერიკული ბიზნესი და მომხმარებელი გადაიხდის ფასს." მისივე თქმით, ვაჭრობასა და სატარიფო ომებში გამარჯვებულები არ არიან და შეერთებული შტატების ქმედებები არ მოაგვარებს მის საშინაო პრობლემებს. პირიქით, დააზიანებს ჩინეთ-ამერიკის ურთიერთობებს და უარყოფითად იმოქმედებს გლობალური ეკონომიკის განვითარებაზე.
შეგახსენებთ, რომ 1 თებერვალს, აშშ-ის პრეზიდენტმა დონალდ ტრამპმა ხელი მოაწერა აღმასრულებელ ბრძანებას მექსიკიდან და კანადიდან იმპორტირებულ საქონელზე 25%-იანი გადასახადის დაწესებაზე. ასევე, ჩინეთიდან ყველა საქონელზე 10%-იანი გადასახადის შემოღების შესახებ. ახალი ნორმები ძალაში 4 თებერვალს შევა.
