კორპორაცია „ბათუმის ნავთობტერმინალმა“ გამოაქვეყნა 2024 წლის აუდიტირებული კონსოლიდირებული ანგარიში, რომლის მიხედვითაც ჯგუფის მთლიანი შემოსავალი $43.4 მილიონს გაუტოლდა და 2023 წელთან შედარებით პრაქტიკულად უცვლელი დარჩა (–0.1%). შემოსავლებში $41.9 მლნ მოდიოდა მომსახურებიდან მიღებულმა ამონაგებმა, ხოლო $1.5 მლნ — საიჯარო შემოსავალმა.
რა მიმართულებებით გაიზარდა პორტის შემოსავალი
2024 წელს შემოსავლების სტრუქტურა და წლიური ცვლილებები ასეთია:
- ნავთობპროდუქტების გადატვირთვა — $20.2 მლნ, –2.6% (2023: $20.7 მლნ).
- სანავსადგურო მოსაკრებელი და სერვისები — $10.1 მლნ, –6.5% (2023: $10.8 მლნ).
- მშრალი ტვირთების ტერმინალი — $7.7 მლნ, +16.6% (2023: $6.6 მლნ).
- სასაწყობე მომსახურება — $3.5 მლნ, –2.7% (2023: $3.6 მლნ).
- სხვა შემოსავალი — $0.4 მლნ, +74.7% (ბალანსზე მცირე ბაზიდან; 2023: $0.2 მლნ).
- საიჯარო შემოსავალი — $1.5 მლნ, +4.6% (2023: $1.4 მლნ).
ჯგუფმა წელი დახურა $4.93 მლნ წმინდა მოგებით, რაც 2023 წლის მაჩვენებელზე $1.95 მლნ-ით მეტია.
2024 წლის ბოლოს ჯგუფის აქტივები $134.9 მლნ იყო, ხოლო საკუთარი კაპიტალი — $51.9 მლნ.
ბათუმის პორტის ოპერირებას ახორციელებენ „ბათუმის ნავთობტერმინალი“ და „ბათუმის საერთაშორისო საკონტეინერო ტერმინალი“.
ფინანსური ანგარიშის მიხედვით, ბათუმის ნავთობტერმინალი ოპერირებს 132 რეზერვუარით, რომელთა საერთო სასარგებლო ტევადობა 400 ათას ტონას აღემატება. კომპლექსის წლიური გამტარუნარიანობა 12 მილიონ ტონაზე მეტია. ტერმინალში მოქმედებს 6 სარკინიგზო ჩამოსასხმელი ესტაკადა, რომლებიც დღე-ღამეში 700-მდე ვაგონ-ცისტერნის მომსახურებას ახორციელებენ. ერთ-ერთ ესტაკადაზე დანერგილია მრავალდონიანი გათბობის სისტემა მძიმე და ბლანტი ნავთობპროდუქტებისთვის.
კომპანიის ინფორმაციით, ბათუმის პორტს გააჩნია 3 ნავმისადგომი, 11 პორტალური ამწე, საბორნე ხიდი, საკონტეინერო და ნავთობჩამოსასხმელი ინფრასტრუქტურა, ასევე საზღვაო სამგზავრო სადგური.
საკუთრების სტრუქტურა:
პორტის მართვის 49-წლიანი ლიცენზია 2006 წელს ყაზახურმა სახელმწიფო კომპანია „KazTransOil“-მა მიიღო. მისი 100%-იანი წილის მფლობელია ყაზახეთის სუვერენული საინვესტიციო ფონდი „Samruk-Kazyna“.
