„საქართველოს ხორბლისა და ფქვილის მწარმოებელთა ასოციაციის“ აღმასრულებელი დირექტორი, ლევან სილაგავა ხორბლის ბაზარზე არსებული ტენდენციების შესახებ საუბრობს.
როგორც სილაგავამ მედიაჰოლდინგ “კვირას” პრესკლუბში გამართულ პრესკონფერენციაზე განაცხადა, ამ სეზონზე ქართველი მეხორბლეები ხორბალს უფრო ღირსეულ ფასად ჩააბარებენ.
” შეგვიძლია, ვთქვათ, რომ ჩვენს რეგიონში ხორბლის ფასი გაძვირებულია, მათ შორის რუსეთში, იმიტომ, რომ ბოლო ორ წელთან შედარებით ხორბლის დაბალ მოსავალს ელოდებიან. იგივეა ევროკავშირის ქვეყნებში, უკრაინაში. რაც შეეხება ყაზახეთს – ჯერ კიდევ ძველი მოსავალი აქვს, ვიცით, რომ ტრანსპორტირებაზე სუბსიდირების პროგრამა მოქმედებს და ეს ოდნავ აბალანსებს, თუმცა ხორბალზე ფასები იმაზე მაღალია, რაც შარშან იყო. ქართულ რეალობაში თუ გადმოვალთ: წინა სეზონის ქართული ხორბლის ჩაბარება უკვე მოხდა და ახალი სეზონი, რომელიც ივნისის თვიდან დაიწყება , ფაქტობრივად, იქნება სეზონი, როდესაც ჩვენი, ქართველი მეხორბლეები ხორბალს უფრო ღირსეულ ფასად ჩააბარებენ. მათთვის ფასის მატება საკმაოდ კარგი ტენდენციაა, თუ გავითვალისწინებთ იმას, რომ წინა ორი წელი მათ ჩაბარების ფასთან მიმართებაში პრობლემები ჰქონდათ. გახსოვთ, ყოველთვის იყო ლაპარაკი იმაზე, რომ წინა ორ სეზონზე ერთი კილოგრამი ხორბლის ჩაბარება 60 თეთრის ფარგლებში იყო. დღეს ჩაბარების ფასი 80-90 თეთრია და შესაბამისად, ივნისის თვიდან თუ ასეთი ტენდენცია შენარჩუნდა, ეს საკმაოდ მაღალი ფასი იქნება, რაც მათთვის ძალიან მნიშვნელოვანი და კარგია.
სოფლის მეურნეობის სამინისტროს და სტატისტიკის სამსახურის მონაცემებით, შარშან მიღებულია, დაახლოებით, 200 000 ტონა ხორბალი, რაც საკმაოდ მაღალია, აქედან სასურსათო, დაახლოებით, 60% იყო. თუ შემდეგ პრობლემები არ გაჩნდა (პრობლემები შეიძლება, გაჩნდეს უბრალოდ ამინდებიდან, სხვადასხვა ტენდენციიდან გამომდინარე), რეალურად ველოდებით საშუალო მოსავალს, სადღაც 200 000 ტონის ფარგლებში”- განაცხადა სილაგავამ.
