Alphabet-ის აქციების ფასი 29 ოქტომბერს 12.6%-ით შემცირდა, რაც კომპანიისთვის 2004 წლის შემდეგ ყველაზე მკვეთრი ერთდღიანი ვარდნაა. შედეგად, ტექნოლოგიურმა გიგანტმა საბაზრო ღირებულებიდან დაახლოებით 500 მლრდ დოლარი დაკარგა. ამის შესახებ The Independent წერს.
აქციების მკვეთრი გაუფასურების ერთ-ერთი მთავარი მიზეზი კომპანიის 2026 წლის მესამე კვარტლის ფინანსური შედეგები გახდა. Alphabet-ის შემოსავალმა 127.6 მლრდ დოლარი შეადგინა, რაც Wall Street-ის ანალიტიკოსების პროგნოზზე ნაკლები აღმოჩნდა. ამასთან, Google-ის სარეკლამო ბიზნესშიც ზრდის ტემპის შენელება დაფიქსირდა.
ინვესტორების შეშფოთება გააძლიერა თავისუფალი ფულადი ნაკადის უარყოფითმა მაჩვენებელმაც. მესამე კვარტალში ის მინუს 9.1 მლრდ დოლარს გაუტოლდა, რაც ნიშნავს, რომ კომპანიამ საოპერაციო საქმიანობისა და ინვესტიციების შემდეგ მიღებულზე მეტი ფული დახარჯა. გამოცემის ცნობით, Alphabet-ს მსგავსი მაჩვენებელი ბოლო 22 წლის განმავლობაში არ ჰქონია.
კომპანიისთვის დამატებით გამოწვევას ხელოვნური ინტელექტის სწრაფი განვითარება წარმოადგენს. მომხმარებლები სულ უფრო ხშირად პასუხებს პირდაპირ Gemini-სა და AI-ზე დაფუძნებული საძიებო ფუნქციების საშუალებით იღებენ, რის გამოც ტრადიციულ საძიებო ბმულებზე გადასვლის საჭიროება მცირდება. ეს კი საფრთხეს უქმნის Google-ის სარეკლამო მოდელს, რომელიც ძიების შედეგებში რეკლამების განთავსებაზეა დაფუძნებული.
შემოსავლების ამ წყაროს შესანარჩუნებლად Google ხელოვნური ინტელექტის მიერ გენერირებულ საძიებო პასუხებშიც აქტიურად ნერგავს სარეკლამო განთავსებებს.
მიუხედავად ამისა, კომპანიის ბიზნესის ყველა მიმართულება უარყოფით ტენდენციას არ აჩვენებს. Google Cloud-ის შემოსავალი გაორმაგდა და 30.71 მლრდ დოლარს გადააჭარბა. ზრდის მთავარი განმაპირობებელი ღრუბლოვან ინფრასტრუქტურასა და ხელოვნური ინტელექტის ინსტრუმენტებზე მოთხოვნის მატება გახდა, რამაც სარეკლამო ბიზნესის შენელების გავლენა ნაწილობრივ შეარბილა.
