ინფლუენსერ მარკეტინგზე მოთხოვნა წლიდან წლამდე იზრდება. ბიზნესები სამიზნე აუდიტორიას დღეს უფრო მეტად ინფლუენსერების მეშვეობით უკავშირდებიან და ტრადიციული საკომუნიკაციო საშუალებებთან შედარებით მას ანიჭებენ უპირატესობას. გაზრდილი მოთხოვნის პარალელურად გაიზარდა ინფლუენსერების მომსახურების ფასიც. მარკეტინგული კომპანია influencer.ge-ს დამფუძნებელი ელდარ პირმისაშვილი ,,კომერსანტთან“ საუბარში აცხადებს, რომ მითი იმის შესახებ, რომ ტელევიზია უფრო ძვირია, ვიდრე ინფლუენსერ მარკეტინგი დღე უკვე აღარ მართლდება. ის ჩვენთან ამ საკომუნიკაციო არხის მიმართ გაზრდილი ინტერესის მიზეზებზე საუბრობს.
,,ზოგადად ძალიან მზარდი ტენდენციაა. ინფლუენსერ მარკეტინგი ფაქტობრივად არის ბრენდებსა და ცნობილ ადამიანებს შორის დამაკავშირებელი. ესენი არიან ვინც ამ მიმართულებით მუშაობს და სოციალურ ქსელშია აქტიური, ვინც ქმნის კონტენტს და ვინც აკავშირებს ბრენდებს მომხმარებლებს. ერთი-ორი წლის წინ ინფლუენსერ მარკეტინგის ფასები შედარებით უფრო დაბალი იყო. ადამიანები ერთ კონტენტში იღებდნენ 500-1000 ლარს. დღეს ეს ფასები ორმაგია. მითი იმის შესახებ, რომ ტელევიზია უფრო ძვირია, ვიდრე ინფლუენსერ მარკეტინგი დღე უკვე აღარ მართლდება. ამას აქვს ორი ახსნა. ერთი ის რომ, ტელევიზიაში განთავსებული მასალების თვლადობა ხშირ შემთხვევაში ძალიან ეჭვქვეშ არის. ვინ უყურა, როგორ და რამდენად თემატური იყო ამის თვლა. მეორე, რადგან უფრო ზოგადია ტელევიზიის კონტენტი და არა კონკრეტული, შესაბამისად უფრო დავარცხნილი და უფრო ფორმალური, შედეგი უფრო ნაკლები აქვს. ტელევიზიას ინფლუენსერ კონტენტზე ერთი უპირატესობა აქვს. ეს არის თარგეთირება. ინფლუენსერს შეიძლება უყუროს 1000-მა. ტელევიზიაში შეიძლება უყუროს 10 000-მა, მაგრამ დამკვეთს ურჩევნია ინფლუენსერი, რადგან ის ძალიან ფოკუსირებულია კონკრეტულ თემაზე. მეორე, სოციალურ ქსელში ძალიან მაღალია თვლადობა. დამკვეთი აუცილებლად მოითხოვს ინფორმაციას იმაზე თუ ვინ ნახა, როგორი რეაქცია მოყვა და ა.შ. რაც ტელევიზიის შემთხვევაში არ ვიცით. ინფლუენსერ მარკეტინგსა და სატელევიზიო სარეკლამო სიუჟეტს შორის ფინანსურად შეიძლება იყოს განსხვავება 10-20%. ტელევიზიაში სიუჟეტი საშუალოდ ღირს 3000-4000 ლარი. დაახლოებით იგივე ღირს ინფლუენსერის ერთი კონტენტი. გაზარდეს ფასები, რადგან მოთხოვნა გაიზარდა“, - აცხადებს ელდარ პირმისაშვილი.
გაზრდილი მოთხოვნის მიუხედავად ინფლუენსერების ბაზარი სიმწირეს განიცდის. სტრატეგიული კომუნიკაციების სპეციალისტი აცხადებს, რომ საქართველოში ცოტა ინფლუენსერია და მათი რაოდენობა ვიწრო პროფილების მიმართულებით კიდევ უფრო მცირეა. ელდარ პირმისაშვილი აცხადებს, რომ ბრენდებს პრემიუმ ხარისხის მომსახურება სჭირდებათ. ბაზარზე ამ მიმართულებითაც პრობლემაა, რადგან ინფლუენსერები მასიურად მაღალი ხარისხის კონტენტს ვერ ქმნიან. ხარისხს კი კონტენტის შინაარსი და ვიზუალი განაპირობებს. ნაკლებ პრობლემას აწყდებიან დამწყები ბიზნესმენები და დაბალ სეგმენტზე გათლილი ბრენდები, რადგან მათ ბაზარზე ინფლუენსერების უფრო დიდი არჩევანი ხვდებათ.
,,ჩვენთან ცოტა არიან ინფლუენსერები და თემატურები კიდევ უფრო ცოტა. ამაში ვგულისხმობ იმას, რომ სხვადასხვა ინდუსტრიებს, სხვადასხვა მოთხოვნები აქვს. მაგალითად, სილამაზის ინდუსტრიას უნდა თავის მოვლაზე ვინც მუშაობს, ტექნოლოგიებს უნდათ ტექ-ინფლუენსერები და ცოტაა ეს ადამიანები. მიუხედავად იმისა, რომ იზრდება პრემიუმ ბრენდები ძალიან ნაკლებად იზრდებიან ინფლუენსერები. იმიტომ, რომ პრემიუმ ხარისხის კონტენტს სხვა დონე სჭირდება. შესაბამისად, ,,ტიკ-ტოკს'' უფრო აქვს ზრდა საშუალო და დამწყები ბრენდებისთვის, ვიდრე პრემიუმ ბრენდებისთვის. მაგალითად, თქვენ რომ გქონდეთ პრემიუმ ბრენდი, იძულებული ხართ ითანამშრომლოთ ინფლუენსერებთან, რადგან თქვენი აუდიტორია სხვას არაფერს არ ნახულობს. პრემიუმ სეგმენტში სულ არის დაახლოებით 20 ადამიანი. ამ 20 ადამიანს უწევს მთელი ბაზრის გადანაწილება. ჩვენი დამკვეთები ხშირად გვეუბნებიან, რომ ერთი და იგივე ხალხია და ერთი და იგივე ადამიანი აკეთებს მაგალითად ავტომობილისა და სუნამოს კონტენტს. მაგრამ საქართველოში არ არის მკვეთრად დაყოფილი ეს სფეროები და თან არ არის ბევრი ხალხი ვინც ამას ხარისხიანად და კარგად აკეთებს. თუმცა გვაქვს კარგი ზრდა ,,ტიკ-ტოკზე''. თუ ბრენდი შედარებით დაბალ სეგმენტშია და დაბალ კატეგორიაში არჩევანი გაცილებით დიდია. თვითონ ინფლუენსერების რაოდენობა მეტია“, - აცხადებს ელდარ პირმისაშვილი.
განსხვავებებს ვაწყდებით სოციალური ქსელებისა და პლატფორმების მიხედვით. პრემიერ ხარისხის ბრენდები მომხმარებლებთან საკომუნიკაციოდ ,,ინსტაგრამს“ იყენებენ. დამწყები და დაბალ სეგმენტზე გათვლილი ბიზნესებისთვის კი მთავარი პლატფორმა ,,ტიკ-ტოკია“. აღსანიშნავია, რომ ბოლო პერიოდში ბრენდები და ბიზნესები სოციალურ ქსელ ,,ფეისბუკში“ რეკლამის განთავსებისგან თავს იკავებენ და შესაბამისად ამ პლატფორმაზე ინფლუენსერ კონტენტის განთავსებასაც იკლო. სტრატეგიული კომუნიკაციების სპეციალისტი ელდარ პირმისაშვილი განმარტავს, რომ ეს ,,ფეისბუკის’’ კონტენტის ცვლილებამ განაპირობა. აღნიშნული სოციალური ქსელი საქართველოში უფრო პოლიტიზებული გახდა, რის გამოც რეკლამების განთავსება ხშირად დროში მიმდინარე მოვლენებს ძალიან ცდება, რაც კომპანიების მიმართ მომხმარებლების აგრესიას იწვევს. ამ ფაქტის გამო კომპანიებს ახლა სარეკლამო სტრატეგიის გადაწყობა უწევთ.
,,ინსტაგრამზე’’ ძირითადად არის მაღალი ხარისხის კონტენტი. შედარებით უფრო სერიოზული და ორიენტირებული მაღალი ხარისხის ვიდეო და ფოტო კონტენტზე. აქ საშუალო და პრემიუმ ხარისხის ბრენდებია წარმოდგენილი. მასობრივ სეგმენტში რომელიც ბოლო ორი წელია ,,ტიკ-ტოკი" წამყვანი გახდა, მაგრამ არა პრემიუმ სეგმენტში. ,,ტიკ-ტოკი’’ არის შედარებით ახალგაზრდული, ნაკლებ სერიოზული და აქ უფრო დაბალი და საშუალო კატეგორიის ბრენდები შედიან. არის კიდევ ახალი ტენდენცია, რომელიც საქართველოში ფიქსირდება. სოციალური ქსელი ,,ფეისბუკი“ ჩვენთან იმდენად პოლიტიზებული გახდა, რომ კომპანიები უკვე ერიდებიან ინფლუენსერ კონტენტის ძალიან აქტიურად დატვირთვას. იმიტომ, რომ ძალიან მაღალი აგრესია არის მომხმარებლების მხრიდან. ვთქვათ, რაღაც კომპანიამ ჯერ დადო ინფორმაცია მიტინგზე და არეულობაზე, მეორე პოსტში დადებს მოწოდებას, რომ იყიდეთ ჩვენი პროდუქცია, ეს არარელევანტურია. ,,ინსტაგრამზე'' და ,,ტიკ-ტოკზე'' ეს თემები შედარებით ნაკლებია. იქ ეს უხერხულობა არ იგრძნობა და ამიტომ ,,ფეისბუკში" დაიწია ინფლუენსერ კონტენტის განთავსებამ. პრობლემური არის ის რომ, კომპანიების უმეტესობას აწყობილი ჰქონდა თავისი ალგორითმები და ბიზნესები ,,ფეისბუკზე". ძალიან აქტიურად ჰქონდათ დატვირთული და ახლა უწევთ გადალაგება, რომ დატვირთონ ,,ინსტაგრამი'' და ,,ტიკ-ტოკი''. რათა იქ შემოიჩვიონ მომხმარებლები და იქ გააგრძელონ კომუნიკაცია მათთან“, - განმარტავს ელდარ პირმისაშვილი.
