რძის პროდუქტების მწარმოებელ კომპანია „სანტეს“ შემოსავალი და მოგება გაეზარდა. „სანტე ჯიემთი პროდუქტებს“ 2024 წლის ფინანსური ანგარიში ჯერ არ გამოუქვეყნებია, თუმცა, 2023 წლის მაჩვენებლების მიხედვით, მისმა შემოსავალმა 100 მლნ ლარს მიაღწია და წლიურად 6%-იანი ზრდა დაფიქსირდა.
2022 წლის 4.5 მილიონიდან 2023 წელს 14 მილიონამდე გაზარდა მთლიანი მოგება, საოპერაციო მოგებამ კი, 1.9 მლნ შეადგინა.
2023 წელს კომპანიამ წმინდა მოგების სახით 13.4 მლნ ლარი მიიღო, რაც წლიურ ჭრილში (2022 წელს 2.8 მლნ მოგება ჰქონდა) 378%-ით გაზრდილი მაჩვენებელია.
კომპანიის 2023 წლის ანგარიშის მიხედვით, „სანტე“ ყოველწლიურად დაახლოებით 12 მლნ ლიტრ რძეს იბარებს და ადგილობრივი ბაზრისთვის 125 -მდე დასახელების პროდუქტს აწარმოებს. სანტეს გეგმებშია „საქართველოში ყველის ბაზრის განვითარება. კომპანია გეგმავს ქვეყნის ფარგლებს გარეთ გაიტანოს ქართული სახელი და ტრადიციები ისეთი პროდუქტების სახით მაგალითად როგორიცაა ქართული ყველი ან თუნდაც ენდემური მაწონი“.
„2023 წელს კომპანიამ განახორციელა კაპიტალური დანახარჯები, მათ შორის ყველის წარმოების გაფართოების მიმართულებით, რის შედეგადაც 20-25%-ით გაიზარდა მწარმოებლურობა“, - ნათქვამია კომპანიის ანგარიშში.
„სანტე ჯი ემ თი“ ბაზარზე 1997 წლიდან ფუნქციონირებს. მისი 100%-იანი წილის მფლობელი ბელგიაში რეგისტრირებული „ბი.ეს.ეი. ინთერნეიშენალ“ არის, ხოლო დირექტორი ერეკლე გამყრელიძე.
