ლონდონის საფონდო ბირჟაზე წარმოდგენილი ქართული კომპანიების აქციებმა გასულ კვირაში შემცირება აჩვენა, თუმცა ნახევარწლიანი დინამიკა კვლავ პოზიტიურია და ინვესტორების მხრიდან ქართული ფინანსური სექტორის მიმართ ინტერესის შენარჩუნებაზე მიუთითებს.
მიმდინარე მონაცემებით, ყველაზე მსხვილი ქართული ემიტენტის, Lion Finance Group PLC (BGEO) აქციების ღირებულება კვირის განმავლობაში 1.72%-ით შემცირდა და 108.50 გირვანქა სტერლინგი შეადგინა. მიუხედავად მოკლევადიანი ვარდნისა, კომპანიის აქციები ბოლო ექვს თვეში 35.5%-ზე მეტით არის გაძვირებული, ხოლო საბაზრო კაპიტალიზაცია 5.3 მილიარდ გირვანქა სტერლინგს აღემატება.
ანალოგიური ტენდენცია დაფიქსირდა TBC Bank Group PLC-შიც. კომპანიის აქციები კვირის განმავლობაში 2.14%-ით შემცირდა და ერთი აქციის ფასი 47.66 გირვანქა სტერლინგამდე დაეცა. მიუხედავად ამისა, ექვსთვიან ჭრილში ბანკის აქციები კვლავ ზრდას ინარჩუნებს და ამ პერიოდში დაახლოებით 9.4%-ით არის გამყარებული. კომპანიის საბაზრო კაპიტალიზაცია 2.6 მილიარდ გირვანქა სტერლინგს აღწევს.
ყველაზე მკვეთრი კლება კი Georgia Capital PLC-ის აქციებზე დაფიქსირდა. მათი ფასი ერთ კვირაში 4.67%-ით შემცირდა და 38.75 გირვანქა სტერლინგი გახდა. თუმცა, გრძელვადიან პერსპექტივაში სწორედ ეს კომპანია რჩება ერთ-ერთ ყველაზე სწრაფად მზარდ აქტივად, რადგან ბოლო ექვს თვეში მისი აქციების ღირებულება თითქმის 50%-ით არის გაზრდილი. კომპანიის საბაზრო კაპიტალიზაცია ამჟამად 1.8 მილიარდ გირვანქა სტერლინგს შეადგენს.
ფინანსური ბაზრების სპეციალისტების შეფასებით, მსგავსი მოკლევადიანი კორექციები განსაკუთრებით ძლიერი ზრდის შემდეგ ბუნებრივ პროცესად მიიჩნევა. თებერვალსა და მარტში ქართული კომპანიების აქციებმა ლონდონის ბირჟაზე მნიშვნელოვანი ზრდა აჩვენეს, განსაკუთრებით Lion Finance Group PLC-ისა და Georgia Capital PLC-ის შემთხვევაში, რის შემდეგაც ინვესტორების ნაწილმა მოგების ფიქსირება დაიწყო.
ანალიტიკოსები ყურადღებას ამახვილებენ იმაზეც, რომ საერთაშორისო ინვესტორებისთვის ქართული კომპანიები კვლავ საინტერესო რჩება მაღალი მომგებიანობის, საბანკო სექტორის ძლიერი ფინანსური შედეგებისა და რეგიონულ ბაზრებთან შედარებით მაღალი კაპიტალის უკუგების მაჩვენებლების გამო. განსაკუთრებით მნიშვნელოვანია ის ფაქტი, რომ ლონდონის საფონდო ბირჟაზე წარმოდგენილი სამი ქართული კომპანია ერთად თითქმის 10 მილიარდ გირვანქა სტერლინგის საბაზრო ღირებულებას აერთიანებს, რაც საქართველოს ეკონომიკის საერთაშორისო კაპიტალის ბაზრებზე წარმოდგენის მთავარი არხია.
მიუხედავად იმისა, რომ ბოლო კვირაში ინვესტორებმა აქციების ფასების შემცირება იხილეს, გრძელვადიანი დინამიკა კვლავ მიუთითებს იმაზე, რომ ქართული კომპანიები საერთაშორისო ფინანსურ ბაზრებზე პოზიციების გამყარებას აგრძელებენ და ინვესტორთა ინტერესის შენარჩუნებას ახერხებენ.
როგორ იცვლება ქართული კომპანიების აქციების ღირებულება ლონდონის საფონდი ბირჟაზე ყოველკვირეულად, გაიგეთ "კომერსანტის" სტატიებიდან.
წყარო: Galt & Taggart
