ნიდერლანდელმა მეცნიერებმა დაადგინეს, რომ ტელევიზორის ყოველდღიური ყურების ერთი საათით შემცირებამ და ამ დროის სხვა საქმიანობით ჩანაცვლებამ შესაძლოა დეპრესიის განვითარების რისკი შეამციროს. ეს გავლენა განსაკუთრებით შესამჩნევია საშუალო ასაკის ადამიანებში.
ბევრი ფიქრობს, რომ სამსახურის შემდეგ საღამოს ტელევიზორის ყურება დამშვიდებისა და დასვენების ერთ-ერთი საუკეთესო საშუალებაა. თუმცა, ნიდერლანდების 65 ათასი მცხოვრების მონაწილეობით ჩატარებულმა კვლევამ საპირისპირო შედეგი აჩვენა.
მეცნიერთა განცხადებით, ტელევიზორის ყურებისთვის განკუთვნილი დროის სულ მცირე ერთი საათით შემცირება და მისი სხვა საქმიანობით ჩანაცვლება ჯანმრთელობისთვის, განსაკუთრებით კი ფსიქოლოგიური მდგომარეობისთვის, უფრო სასარგებლოა.
კვლევის თანახმად, ტელევიზორის ყოველდღიურად ერთი საათით ნაკლები ხნით ყურება მძიმე დეპრესიის განვითარების რისკს 11 პროცენტით ამცირებს. თუ ტელევიზორთან გატარებული დრო საათ-ნახევრით ან ორი საათით შემცირდება, რისკი უკვე 16 პროცენტით იკლებს.
მნიშვნელობა არ აქვს, რით ჩაანაცვლებს ადამიანი ტელევიზორის ყურებას — საყვარელი საქმიანობით, მეგობრებთან შეხვედრით თუ დამატებითი ძილით. თუმცა ყველაზე ეფექტიანი ფიზიკური აქტივობა აღმოჩნდა.
მხოლოდ ნახევარსაათიანი ვარჯიში დეპრესიული აშლილობის განვითარების რისკს 18 პროცენტით ამცირებს, ხოლო ერთსაათიანი ფიზიკური აქტივობა — 30 პროცენტზე მეტით.
შედეგი განსაკუთრებით მკვეთრად 40-დან 59 წლამდე ასაკის ადამიანებში გამოვლინდა. კვლევის მიხედვით, ტელევიზორის ყურების ერთი საათით შემცირება ამ ასაკობრივ ჯგუფში დეპრესიის განვითარების რისკს თითქმის 19 პროცენტით ამცირებს.
თუ საშუალო ასაკის ადამიანები ტელევიზორს ყოველდღიურად საათ-ნახევრით ან ორი საათით ნაკლებ დროს დაუთმობენ, დეპრესიის განვითარების რისკი შესაძლოა 43 პროცენტით შემცირდეს.
ხანდაზმულებსა და ახალგაზრდა ზრდასრულებში მსგავსი გავლენა გაცილებით სუსტად გამოვლინდა. მეცნიერებმა ამ განსხვავების ზუსტი მიზეზი ჯერჯერობით არ იციან.
https://euro-pulse.ru/news/otkaz-ot-televizora-pomogaet-pri-depressii-uchenye-iz-niderlandov/
