რუსეთის ცენტრალური ბანკი Wildberries-ის ლოგისტიკურ ცენტრებზე დრონებით განხორციელებული იერიშების გამო სადაზღვევო სექტორისთვის სპეციალური დახმარების დაწესებას არ განიხილავს. ამის შესახებ ცენტრალური ბანკის ხელმძღვანელმა ელვირა ნაბიულინამ 24 ივლისს გამართულ პრესკონფერენციაზე განაცხადა.
ნაბიულინას შეფასებით, რუსეთის სადაზღვევო სექტორს ზარალის ანაზღაურებისა და ფინანსური მდგრადობის შესანარჩუნებლად საკმარისი რესურსი აქვს. რისკების ნაწილს რუსეთის ეროვნული გადაზღვევის კომპანია ფარავს, რომლის პოლისებიც ქონების დაზიანებას დრონების თავდასხმის შემთხვევაშიც ითვალისწინებს.
Wildberries-ის საწყობებზე თავდასხმები რამდენიმე ეტაპად განხორციელდა. 18 ივლისს ტამბოვის ოლქის ქალაქ კოტოვსკში კომპანიის საწყობზე დარტყმის შედეგად შვიდი თანამშრომელი დაიღუპა და სულ მცირე 25 ადამიანი დაშავდა. 22 ივლისს ცეცხლი გაჩნდა კომპანიის ლოგისტიკურ ცენტრებში კრასნოდარსა და ნევინომისკშიც. Wildberries-ის ინფორმაციით, ორივე ობიექტის მუშაობა დროებით შეჩერდა.
Reuters-ის ცნობით, 18 ივლისიდან იერიშებმა კომპანიის რვა ლოგისტიკური ობიექტი და Wildberries-ის სასაწყობო შესაძლებლობების 10%-ზე მეტი მოიცვა. თავდასხმების შედეგად ზარალი მიიღეს ათიათასობით მცირე მეწარმემ, რომლებიც პროდუქციას კომპანიის საწყობებში ინახავდნენ. Wildberries-მა 88 000-ზე მეტი გამყიდველისთვის კომპენსაციის გაცემა დაიწყო, თუმცა კომპანიაში აცხადებენ, რომ დრონებით გამოწვეული ზარალი ფორსმაჟორულ გარემოებად განიხილება.
უკრაინის ხელისუფლება აცხადებს, რომ აღნიშნული ლოგისტიკური ცენტრები რუსეთის სამხედრო ძალების მომარაგებაში, მათ შორის დრონების კომპონენტებისა და სანავიგაციო მოწყობილობების მიწოდებაში მონაწილეობდა. Wildberries ამ ბრალდებას უარყოფს.
წყაროები:
https://www.reuters.com/business/retail-consumer/russian-entrepreneurs-see-stock-go-up-flames-ukraine-targets-wildberries-2026-07-24/
https://www.kommersant.ru/doc/8844087
https://www.interfax.ru/amp/1105368
https://www.euronews.com/2026/07/22/russia-reports-fresh-drone-strikes-on-wildberries-logistics-hubs
