იტალიური რესტორანი ,,Melograno • მელოგრანო’’ მომხმარებლებს მხოლოდ საუზმეს სთავაზობს. სტუმრებს 8-დან 12 საათამდე იღებენ. სამუშაო დღის შემცირების მიზეზად რესტორნის ადგილმდებარეობას ასახელებენ. ,,Melograno • მელოგრანო’’ პარლამენტის უკან, პროტესტის ეპიცენტრთან ახლოს მდებარეობს. გენერალური მენეჯერი ,,კომერსანტთან“ აცხადებს, რომ ზამთრის პერიოდში რესტორანს ისედაც შემცირებული მომხმარებელი ჰყავდა, თუმცა აქციების პერიოდში სტუმრების რაოდენობა კატასტროფულად შემცირდა. რესტორანი სასტუმრო ,,Shota Rustaveli Boutique Hotel’’-ის შემადგენელი ნაწილია. რის გამოც მენეჯმენტმა მხოლოდ საუზმის სერვისის შეთავაზება გადაწყვიტა.
,,რესტორანი დავხურეთ. დავტოვეთ მხოლოდ საუზმეზე, რადგან რესტორანი არის სასტუმროს ნაწილი. საუზმე აუცილებლად უნდა დაგვეტოვებინა. მიზეზი არის ძალიან შემცირებული მომხმარებელი. ეს დიდი წილად იქიდან გამომდინარეა, რომ ჩვენ ვართ პარლამენტის გვერდით, პირველი სკოლის უკან და ჩვენი ლოკაცია ძალიან რთულია. მომხმარებელი იშვიათად გვსტუმრობს, რადგან ცხელი ადგილია.’’- აცხადებს გენერალური მენეჯერი ნინო ჩუბინიძე-დელბარი.
ზამთრის სეზონზე რესტორანი ,,Melograno • მელოგრანო’’ ყოველთვის ნაკლებ მომხმარებელს იღებდა, თუმცა გაზაფხულის დადგომისა და სეზონის გააქტიურებასთან ერთად, სტუმრების რაოდენობაც იზრდებოდა. წელს სეზონის დაწყებამ მათი მდგომარეობა არ გააუმჯობესა. რესტორნის შემოსავალი თითქმის 40%-ით შემცირდა. თანხების დაზოგვის მიზნით მენეჯმენტმა 12 საათის შემდეგ მისი დახურვის გადაწყვეტილება მიიღო.
,,ზამთარში ზოგადად იყო ხოლმე მომხმარებლის კლება. კატასტროფული ვარდნა დაიწყო მას შემდეგ რაც აქ დაიწყო მანიფესტაციები, ანუ ნოემბრის ბოლოდან. ზამთარი საერთოდ რთული პერიოდი იყო ყოველთვის. ვერ ვიტყვი, რომ რესტორანს ზამთრის პერიოდში განსაკუთრებით კარგი შედეგები ჰქონდა. მაგრამ ამან ფაქტობრივად 30-40%-ით შეამცირა რესტორნის შემოსავლები. გაზაფხული რომ დადგა გვქონდა მოლოდინი, რომ ცოტა გამოკეთდებოდა ვითარება. გადავწყვიტეთ, რომ გაგვეჩერებინა რესტორნის ფუნქციონირება, რათა დაგვეზოგა თანხები. რესტორანი სასტუმროს ნაწილია. 31-შიც აქცია რომ იყო, მაშინვე დაიწყო პრობლემები, რადგან ბევრი სტუმარი თვლის, რომ უსაფრთხო აღარ არის აქ გაჩერება. შესაბამისად, ბიზნესისთვის დამატებით რესტორნის ხარჯები მძიმე იქნებოდა. ამ ეტაპზე გადავწყვიტეთ დაგვეხურა. რესტორანში ძირითადი ნაწილი მოდის საღამო საათებში. საღამო საათებში აქ ქუჩას კეტავენ ან პოლიცია არავის არ აძლევს მანქანის გაჩერების საშუალებას. მოკლედ, ტერიტორია არ არის ისეთი, სადაც მოგინდება რესტორანში წასვლა. ბოლო თვეების განმავლობაში ასეთი რეპუტაცია შეიქმნა, რომ აქ არ არის სიმშვიდე. რაც აფრთხობს ტურისტსაც. განსაკუთრებით ადგილობრივებისთვის, როდესაც ზამთარში რესტორანი ადგილობრივზეა დამოკიდებული, მან ძალიან კარგად იცის რა სიტუაცია შეიძლება დახვდეს რუსთაველზე. თუმცა სიმშვიდე იყო დეკემბრის შემდეგ. აგრესიული ფორმა მანიფესტაციებს არ მიუღია, მაგრამ თავს მაინც არიდებენ.’’- აცხადებს ნინო ჩუბინიძე-დელბარი.
ზამთრის პერიოდი რთული გამოდგა სასტუმროსთვისაც. ,,Shota Rustaveli Boutique Hotel’’-მა მძიმე ზამთარი გადაიტანა - აცხადებს ,,კომერსანტთან“ საუბარში გენერალური მენეჯერი. ნინო ჩუბინიძე-დელბარის თქმით, წელს წინა წელთან შედარებით სასტუმროს შემოსავლებმა 25%-ით იკლო.
,,სასტუმროსაც ჰქონდა პრობლემები მთელი ზამთრის განმავლობაში. ძალიან მძიმე ზამთარი გავიარეთ. სასტუმროს ნაწილში დაახლოებით 25%-იანი შემცირებული შემოსავლები გვქონდა, ვიდრე შარშან ზამთარს. სასტუმრომ ახლა დაიწყო მუშაობა და თუ მშვიდობა იქნება ჩვენს ტერიტორიაზე, სეზონი დაიწყო და ბევრად უფრო გააქტიურებულია.‘’- აცხადებს სასტუმროს გენერალური მენეჯერი.
