პოლონეთის პრეზიდენტმა კაროლ ნავროცკიმ განაცხადა, რომ უკრაინის ევროკავშირში შესაძლო გაწევრიანება პოლონეთის სოფლის მეურნეობის სექტორისთვის მნიშვნელოვან გამოწვევებს ქმნის და ქვეყნის ხელისუფლება ეროვნული მწარმოებლების ინტერესების დაცვას გააგრძელებს. მისი თქმით, პოლონეთი მხარს უჭერს უკრაინას უსაფრთხოებისა და გეოპოლიტიკური სტაბილურობის საკითხებში, თუმცა ევროკავშირში ინტეგრაციის პროცესმა პოლონელი ფერმერების კონკურენტუნარიანობა არ უნდა დააზარალოს.
ნავროცკიმ აღნიშნა, რომ უკრაინის აგროსექტორის მასშტაბი და წარმოების შედარებით დაბალი ხარჯები ევროკავშირის საერთო ბაზარზე კონკურენციის პირობებს მნიშვნელოვნად ცვლის. მისი შეფასებით, უკრაინის სრული ინტეგრაცია ევროკავშირის სასოფლო-სამეურნეო პოლიტიკაში განსაკუთრებულ გავლენას სწორედ პოლონეთის ფერმერულ სექტორზე მოახდენს.
პოლონეთის პრეზიდენტი ამ თემაზე პირველად არ საუბრობს. ჯერ კიდევ 2025 წელს იგი აცხადებდა, რომ უკრაინის ევროკავშირში გაწევრიანებას ამ ეტაპზე არ უჭერს მხარს და ერთ-ერთ მთავარ მიზეზად სწორედ სოფლის მეურნეობისა და სატრანსპორტო სექტორის ინტერესებს ასახელებდა. მისი თქმით, ვარშავამ უკრაინას მხარდაჭერა უნდა გაუწიოს, თუმცა „არა პოლონეთის ეკონომიკური ინტერესების ხარჯზე“.
ბოლო წლებში უკრაინული მარცვლეულის, შაქრისა და სხვა აგროპროდუქციის ევროკავშირის ბაზარზე შესვლამ პოლონეთში არაერთი საპროტესტო აქცია გამოიწვია. პოლონელი ფერმერები აცხადებდნენ, რომ იაფი უკრაინული პროდუქცია ადგილობრივ წარმოებას კონკურენციას უწევს და ფასებზე ზეწოლას ახდენს. სწორედ ამიტომ, უკრაინის ევროკავშირში გაწევრიანების საკითხი პოლონეთში მხოლოდ საგარეო პოლიტიკის თემა აღარ არის და შიდა ეკონომიკურ და პოლიტიკურ დებატებშიც მნიშვნელოვან ადგილს იკავებს.
ამასთან, ნავროცკი ხაზგასმით აღნიშნავს, რომ მისი პოზიცია არ ცვლის პოლონეთის შეფასებას რუსეთის აგრესიის მიმართ და უკრაინის მხარდაჭერის აუცილებლობას. თუმცა, მისი განცხადებით, ევროკავშირში გაფართოების პროცესისას პოლონეთის ეროვნული ეკონომიკური ინტერესები, განსაკუთრებით სოფლის მეურნეობის სფეროში, პრიორიტეტად უნდა დარჩეს.
„მე პოლონეთის პრეზიდენტი ვარ, მიუხედავად იმისა, რომ მესმის უკრაინის მისწრაფებები, ყოველთვის დავიცავ პოლონელი ფერმერებისა და პოლონური სასოფლო-სამეურნეო პროდუქციის ინტერესებს, მათ შორის „მწვანე შეთანხმებისა“ და ევროკავშირის გადაწყვეტილებების კონტექსტში“, – განაცხადა ნავროცკიმ.
