ევროპარლამენტმა და ევროკავშირის საბჭომ ორ ათწლეულზე მეტი ხნის განმავლობაში საჰაერო მგზავრების უფლებების პირველი მასშტაბური რეფორმის შესახებ პოლიტიკურ შეთანხმებას მიაღწიეს. ამის შესახებ ინფორმაცია ევროკომისიის ვებსაიტზე გამოქვეყნდა.
შეთანხმება ითვალისწინებს კომპენსაციის მიღების უფლებას იმ მგზავრებისთვის, რომელთა ფრენები გაუქმდა ან სამ საათზე მეტი დაგვიანებით განხორციელდა. კომპენსაციის ოდენობა უცვლელი რჩება:
→ 250 ევრო მოკლე ფრენებისთვის (1500 კმ-მდე);
→ 400 ევრო საშუალო ფრენებისთვის (1500-დან 3500 კმ-მდე);
→ 600 ევრო შორ მანძილზე ფრენებისთვის.
გარდა ამისა, ავიაკომპანიებმა მგზავრებს უნდა მიაწოდონ უფრო მკაფიო ინფორმაცია მათი უფლებებისა და კომპენსაციის გადახდის პროცედურების შესახებ.
ევროკავშირმა მოახერხა ავიაციის საწვავის დეფიციტის თავიდან აცილება, რომლის შიშიც ჰორმუზის სრუტის დახურვისა და ნავთობისა და ნავთობპროდუქტების გლობალური მარაგების შემცირების შემდეგ იყო. ამავდროულად, საწვავის მაღალი ფასების გამო, ზოგიერთმა ავიაკომპანიამ დაიწყო წამგებიანი მარშრუტების მიტოვება.
ახლო აღმოსავლეთიდან მოწოდებების შემცირების შედეგად გამოწვეულმა ავიასაწვავის დეფიციტმა შესაძლოა ევროპაში ფრენების ფართომასშტაბიანი გაუქმება და საჰაერო მგზავრობის ხარჯების მკვეთრი ზრდა გამოეწვია. ის ფაქტი, რომ ევროკავშირმა შეძლო ამ დანაკარგების კომპენსირება ალტერნატიული მარაგებით, მისი ენერგეტიკული და ლოჯისტიკური სისტემების მდგრადობაზე მეტყველებს.
14 წლამდე ასაკის ბავშვებს შეეძლებათ მშობლების ან თანმხლები ზრდასრულების გვერდით ჯდომა დამატებითი გადასახადის გარეშე. ეს ავიაკომპანიებისთვის სავალდებულო მოთხოვნა გახდება.
ახალი წესები ასევე მოიცავს:
→ ერთი პირადი ნივთის (მაგალითად, ზურგჩანთის ან ჩანთის) ბორტზე უფასოდ ტარების უფლება;
→ ავიაკომპანიებმა, აგრეგატორებმა და ბილეთების ვებსაიტებმა დაუყოვნებლივ უნდა გამოაქვეყნონ ბილეთის სრული ფასი, ხელბარგის ჩათვლით;
→ გადამზიდავებს შეეძლებათ უფრო კონკურენტუნარიანი ტარიფების შეთავაზება დამატებითი ხელბარგის გარეშე მგზავრებისთვის.
თუ რეისი გაუქმდება, გადამზიდავმა უნდა შესთავაზოს ალტერნატიული მარშრუტი განსაზღვრულ ვადაში. თუ ეს ვერ მოხერხდა, მგზავრს შეეძლება სხვა ბილეთის შეძენა და კომპენსაციის მოთხოვნა დადგენილი ლიმიტების ფარგლებში.
გარდა ამისა, ავიაკომპანიებს აეკრძალებათ მგზავრებისთვის ჩასხდომის ბარათის მისაღებად მობილური აპლიკაციის ჩამოტვირთვის მოთხოვნა. ასევე, ონლაინ რეგისტრაციის შემდეგ დაბეჭდილი ჩასხდომის ბარათისთვის საფასურის გადახდა აღარ იქნება შესაძლებელი.
სახელსა და გვარში მცირე ორთოგრაფიული შეცდომები აღარ გამოიწვევს დამატებით საფასურს.
შეთანხმება ასევე აძლიერებს შეზღუდული შესაძლებლობის მქონე ან მობილობის პრობლემების მქონე მგზავრების დაცვას.
