აშშ-ის სადაზვერვო სტრუქტურების ახალი შეფასებების მიხედვით, რუსეთის პრეზიდენტმა ვლადიმერ პუტინმა მომდევნო წლებში შესაძლოა NATO-ს წევრი სახელმწიფოს წინააღმდეგ შეზღუდული მოქმედება განახორციელოს, რომლის მიზანიც ალიანსის ერთიანობისა და კოლექტიური თავდაცვის ვალდებულების გამოცდა იქნება.
CNN-ის ინფორმაციით, ამერიკული დაზვერვა შესაძლო სცენარებად კიბერშეტევას, ჰიბრიდულ ოპერაციას ან NATO-ს წევრი ქვეყნის ტერიტორიაზე შეზღუდულ შეჭრას განიხილავს. ზუსტი ადგილი და დრო უცნობია.
The Wall Street Journal-ის ცნობით, შეფასებები მოიცავს პერიოდს 2026 წლის შემოდგომიდან 2029 წლამდე. ამასთან, მცირე მასშტაბის პირდაპირი სახმელეთო შეჭრა ნაკლებად სავარაუდო სცენარად განიხილება, რადგან მას NATO-ს ხელშეკრულების მე-5 მუხლის ამოქმედების მაღალი რისკი ახლავს. უფრო რეალისტურ საფრთხეებად კიბერშეტევები, საბოტაჟი და სხვა ჰიბრიდული მოქმედებები სახელდება.
NATO-ს წარმომადგენელმა მარტინ ო’დონელმა CNN-ს განუცხადა, რომ ალიანსი საიდუმლო სადაზვერვო შეფასებებს არ განიხილავს, თუმცა მზად არის ნებისმიერი საფრთხის შესაკავებლად და წევრი ქვეყნების დასაცავად.
მსგავსი რისკების შესახებ ევროპელი ოფიციალური პირებიც საუბრობენ. გერმანიის სამხედრო და სადაზვერვო სტრუქტურების წარმომადგენლები აცხადებდნენ, რომ რუსეთს NATO-ს წინააღმდეგ შეზღუდული მოქმედების განხორციელების შესაძლებლობა უკვე აქვს, თუმცა ასეთი გადაწყვეტილება დამოკიდებული იქნება დასავლეთის თავდაცვით მზადყოფნასა და რუსეთის სამხედრო შესაძლებლობებზე.
NATO-მ ივლისში ანკარის სამიტზე კიდევ ერთხელ დაადასტურა მე-5 მუხლის პრინციპი, რომლის მიხედვითაც ერთ წევრზე თავდასხმა მთელ ალიანსზე თავდასხმად განიხილება.
წყაროები:
CNN, 7 აგვისტო:
https://transcripts.cnn.com/show/cnc/date/2026-08-07/segment/12
The Wall Street Journal:
https://www.wsj.com/world/europe/u-s-intel-finds-putin-could-test-natos-resolve-with-limited-incursion-e3b02e2c
Reuters, რუსეთის შესაძლო შეზღუდული მოქმედებების შესახებ გერმანიის სამხედრო შეფასება:
https://www.reuters.com/business/aerospace-defense/german-general-says-russia-could-launch-limited-attack-nato-any-time-2025-11-07/
Reuters, გერმანიის საგარეო დაზვერვის შეფასება:
https://www.reuters.com/world/russia-has-plans-test-natos-resolve-german-intelligence-chief-warns-2025-06-09/
NATO, ანკარის სამიტის ოფიციალური დეკლარაცია:
https://www.nato.int/en/about-us/official-texts-and-resources/official-texts/2026/07/08/the-ankara-summit-declaration
