ნიდერლანდებში შეიმუშავეს ბეტონი, რომელიც მშენებლობის დასრულების შემდეგ მთლიანად ხავსით იფარება. ამისთვის მასალა უფრო ფოროვანი გახადეს - ასეთი ზედაპირი ტენს უკეთ იწოვს და ინარჩუნებს, ხავსს კი მასზე მიმაგრება და ზრდა უადვილდება.
ხავსი ძველი ბეტონის ნესტიან ზედაპირზე ხშირად ბუნებრივად ჩნდება. ნიდერლანდებში ხავსის 500-ზე მეტი სახეობაა გავრცელებული, რომელთაგან დაახლოებით 40-ს თითქმის ნებისმიერ მყარ ზედაპირზე - ქვაზე, აგურსა და ბეტონზე - შეუძლია ზრდა. თუმცა ბუნებრივ პირობებში ამ პროცესის კონტროლი შეუძლებელია.
ამიტომ ნიდერლანდელმა ინჟინრებმა გადაწყვიტეს, არ დალოდებოდნენ, სად გაჩნდებოდა ხავსი ბუნებრივად და შეექმნათ მასალა, რომელზეც ის გარანტირებულად შეძლებდა ზრდას.
ახალი ბეტონი ჩვეულებრივ ბეტონზე უფრო ფოროვანია. ამის გამო ხავსი ზედაპირზე უფრო მარტივად მაგრდება და დროთა განმავლობაში მას მთლიანად ფარავს.
შეიძლება გაჩნდეს კითხვა, რატომ არის საჭირო ასეთი მასალა, როდესაც შენობებზე გაჩენილი ხავსის მოშორებას, ჩვეულებრივ, ცდილობენ.
საქმე ისაა, რომ შენობების ხავსით დაფარულ ზედაპირებს ერთდროულად რამდენიმე მნიშვნელოვანი ფუნქციის შესრულება შეუძლია. ხავსი ქალაქის ჰაერის გაწმენდას უწყობს ხელს, ცხელ ამინდში გარემოს საშუალო ტემპერატურას რამდენიმე გრადუსით ამცირებს, ნაწილობრივ შთანთქავს ხმაურს და აორთქლების საშუალებით კედლებს მზეზე ნაკლებად გახურებაში ეხმარება.
ამასთან, ხავსით დაფარული „მწვანე“ კედლები ჩვეულებრივ ბეტონის ზედაპირებთან შედარებით უფრო მიმზიდველად გამოიყურება.
მჭიდროდ განაშენიანებულ ევროპულ ქალაქებში ახალი სკვერებისა და პარკებისთვის ადგილი ხშირად აღარ რჩება. სამაგიეროდ, ყველგან გვხვდება ვერტიკალური ზედაპირები - შენობების ფასადები, ღობეები და ხმაურისგან დამცავი კედლები, რომელთა გამწვანებაც ახალი მასალის დახმარებით იქნება შესაძლებელი.
ხავსი ვერტიკალური გამწვანებისთვის განსაკუთრებით მოსახერხებელია, რადგან მას ნიადაგი არ სჭირდება. მცენარეთა უმრავლესობისგან განსხვავებით, ის საკვები ნივთიერებების ძირითად ნაწილს ფესვების ნაცვლად ფოთლების საშუალებით იღებს. ფესვები მას მხოლოდ ზედაპირზე დასამაგრებლად სჭირდება.
შემქმნელების აზრით, ახალი ტიპის ბეტონის გამოყენება, პირველ რიგში, საცხოვრებელი სახლების მშენებლობაში იქნება შესაძლებელი. მისი გამოყენება ასევე იგეგმება მონაცემთა ცენტრებისა და საწყობების კედლებისთვის.
„ხავსიანი“ ბეტონი სტარტაპმა Respyre-მ შექმნა. კომპანიის ხელმძღვანელმა აუკე ბლეიმ ამ ინოვაციაზე მუშაობა ჯერ კიდევ დელფტის ტექნოლოგიურ უნივერსიტეტში სწავლისას დაიწყო.
