კანადის მთავრობა ახალ კანონპროექტს წარადგენს, რომელიც ადამიანებს საშუალებას მისცემს, წინასწარ მოითხოვონ სამედიცინო დახმარებით სიცოცხლის დასრულება იმ შემთხვევაში, თუ მომავალში დაკარგავენ გადაწყვეტილების დამოუკიდებლად მიღების უნარს. ამ ნაბიჯმა შესაძლოა კიდევ უფრო გააფართოოს კანადაში მოქმედი სისტემა, რომელიც სამედიცინო დახმარებით სიცოცხლის დასრულების მიმართულებით, მსოფლიოში ერთ-ერთ ყველაზე ლიბერალურად მიიჩნევა.
კანადის იუსტიციის მინისტრის, შონ ფრეიზერის განცხადებით, ახალი კანონმდებლობა სრულწლოვან პირებს მისცემს შესაძლებლობას, წინასწარ განაცხადონ თანხმობა ევთანაზიაზე, რათა მათი სურვილი გათვალისწინებული იყოს იმ შემთხვევაშიც, თუ მათ განუკურნებელი დაავადება განუვითარდებათ და გადაწყვეტილების მიღების უნარს დაკარგავენ.
მინისტრის განმარტებით, მთავრობა პროვინციებთან და ტერიტორიებთან ითანამშრომლებს, რათა ახალი წესების განხორციელება შესაძლებელი გახდეს. ამასთან, გათვალისწინებული იქნება მკაცრი გარანტიები, რომლებიც ადამიანებს დაიცავს და უზრუნველყოფს, რომ გადაწყვეტილება ნებაყოფლობით, გარე ზეწოლის გარეშე იყოს მიღებული.
მთავრობის განმარტებით, ევთანაზიაზე წინასწარი თანხმობის გაცემა არ ნიშნავს, რომ პროცედურა მოგვიანებით ავტომატურად ჩატარდება. ახალი დამცავი მექანიზმების თანახმად, პროცედურის განხორციელების მომენტში ადამიანს უნდა ჰქონდეს აუტანელი ტანჯვა.
კანონპროექტის მიღების შემთხვევაშიც კი, თითოეულ პროვინციასა და ტერიტორიას თავად მოუწევს გადაწყვიტოს, დაუშვებს თუ არა საკუთარ იურისდიქციაში წინასწარი მოთხოვნების გამოყენებას. ასეთი შესაძლებლობა კვებეკის პროვინციაში უკვე არსებობს.
კანადამ ევთანაზია 2016 წელს დააკანონა იმ ადამიანებისთვის, რომლებიც ტერმინალურ მდგომარეობაში იმყოფებიან. 2021 წელს კანონი გაფართოვდა და პროცედურის მოთხოვნის შესაძლებლობა განუკურნებელი, თუმცა არა აუცილებლად ტერმინალური მდგომარეობის მქონე პირებზეც გავრცელდა.
ევთანაზიაზე წინასწარი მოთხოვნების გაკეთება კანონით დაშვებულია სხვა ქვეყნებშიც, მათ შორის ნიდერლანდებში, ბელგიასა და ესპანეთში.
