„ბეშიქთაში“ ზამთარში სამ მოთამაშეს დაიმატებს, მათ შორის ერთ-ერთი „სენტ-ეტიენის“ შემტევი ნახევარმცველი ზურიკო დავითაშვილი იქნება – ინფორმაციას Haberler-ი ავრცელებს. გამოცემის მტკიცებით, ტრანსფერის თაობაზე გუნდებს შორის მოლაპარაკება დაწყებულია და იანვარში დასრულდება.
„„ბეშიქთაში“ სამ ტრანსფერს გეგმავს, გუნდი ნახევარდაცვისა და თავდასხმის გაძლიერებას შეეცდება. საუბარია დორტმუნდის „ბორუსიის“ ნახევარმცველის, სალიჰ ოზჯანის, „სენტ-ეტიენის“ გარემარბის, ზურიკო დავითაშვილისა და „პორტუს“ თავდამსხმელის, დენიზ გიულის დამატებაზე.
ზურიკო დავითაშვილმა ყურადღება საფრანგეთის ლიგა 1-ში თავისი კარგი თამაშით მიიპყრო. 24 წლის ფეხბურთელს, რომელიც „სენტ-ეტიენში“ გამოდის, თავისი სათამაშო უნარებით შეუძლია, მარცხენა ფლანგზე გუნდის თამაში გააძლიეროს.
„ბეშიქთაშის“ წარმომადგენლები ფრანგულ კლუბთან ტრანსფერზე მოლაპარაკებებს განაგრძობენ და მოსალოდნელია, რომ გარიგება იანვრის დასაწყისში დასრულდება“, – ამტკიცებს თურქული გამოცემა.
