იაპონური ავტოინდუსტრიის ერთ-ერთი ისტორიული ქარხანა შესაძლოა სრულიად ახალ ფუნქციას მოერგოს. Reuters-ის ინფორმაციით, ამერიკული თავდაცვითი ტექნოლოგიების კომპანია Anduril Industries Nissan-ის Oppama-ს ქარხნის შესაძლო შეძენაზე მოლაპარაკებებს აწარმოებს.
თუ გარიგება შედგება, ტოკიოს მახლობლად მდებარე ობიექტი, რომელიც ათწლეულების განმავლობაში Nissan-ის ერთ-ერთი მთავარი საწარმოო ცენტრი იყო, შესაძლოა სამხედრო დანიშნულების უპილოტო საფრენი აპარატების წარმოებისთვის გამოიყენონ.
Oppama-ს ქარხანა 1961 წელს გაიხსნა და ამ დროის განმავლობაში დაახლოებით 18 მილიონი ავტომობილი გამოუშვა. სწორედ აქ დაიწყო 2010 წელს Nissan Leaf-ის, კომპანიის პირველი მასობრივი წარმოების ელექტრომობილის, წარმოებაც. თუმცა Nissan-მა გასულ წელს განაცხადა, რომ საწარმოო პროცესების შემცირების გეგმის ფარგლებში ქარხნის დახურვას 2028 წლისთვის გეგმავს.
კომპანიის გეგმით, Oppama-ში დასაქმებული დაახლოებით 2400 თანამშრომელი იაპონიაში Nissan-ის სხვა საწარმოებში უნდა გადანაწილდეს. თუმცა Anduril-ის ინტერესმა ქარხნის მომავალი ახალი კუთხით დააყენა. Reuters-ის წყაროების ცნობით, ამერიკულ კომპანიას საბოლოო გადაწყვეტილება ჯერ არ მიუღია და არც ის არის გადაწყვეტილი, ობიექტის რა ნაწილი დასჭირდება დრონების წარმოებისთვის.
Oppama-ს მთავარი უპირატესობა მისი მასშტაბი და ინფრასტრუქტურაა. ქარხანა 1.7 მილიონ კვადრატულ მეტრზეა განთავსებული და საწარმოო სივრცეებთან ერთად კვლევით, სატესტო და საპორტო ინფრასტრუქტურასაც მოიცავს. ეს კი თავდაცვითი ტექნოლოგიების მწარმოებლისთვის მნიშვნელოვან შესაძლებლობას ქმნის.
მოლაპარაკებების ერთ-ერთი მიმართულება თანამშრომლების გადამზადებაც არის. განიხილება, რომ ქარხნის არსებული პერსონალი მომავალში სამხედრო ტექნიკის წარმოების პროცესში ჩაერთოს. თუმცა ასეთი პროექტის ეკონომიკური გამართლება, სავარაუდოდ, იაპონიის თავდაცვის ძალების შეკვეთებზეც იქნება დამოკიდებული.
Nissan ობიექტის გასხვისებაზე სხვა კომპანიებთანაც აწარმოებს მოლაპარაკებებს. თავად Anduril-მა კონკრეტულ გარიგებაზე კომენტარი არ გააკეთა, თუმცა აღნიშნა, რომ იაპონიასთან თანამშრომლობს და ქვეყანაში ადგილობრივი წარმოების გაფართოების შესაძლებლობებს სწავლობს.
Oppama-ს შესაძლო გარდაქმნას კრიტიკოსებიც გამოუჩნდნენ. მათი ნაწილი მიიჩნევს, რომ ისტორიული ავტომწარმოებელი ქარხნის სამხედრო დანიშნულების საწარმოდ გადაკეთება იაპონიას ომისშემდგომი პაციფისტური პოლიტიკისგან კიდევ უფრო დააშორებს. დამატებით კითხვებს აჩენს ისიც, რომ პოტენციური მყიდველი ამერიკული თავდაცვითი კომპანიაა.
საბოლოო გადაწყვეტილება ჯერ მიღებული არ არის, თუმცა შემთხვევა კარგად აჩვენებს, როგორ იცვლება გლობალური ინდუსტრიული ლანდშაფტი. ქარხნები, რომლებიც ათწლეულების განმავლობაში ავტომობილებს აწარმოებდნენ, დღეს შესაძლოა თავდაცვითი ტექნოლოგიების ახალ ეპოქაში გადაერთონ.
