გლობალურ ვისკის ბაზარზე 2025 წელი გამოწვევებით გამოირჩეოდა. სავაჭრო დაპირისპირებებმა, ჭარბმა მიწოდებამ და კანადაში ამერიკული ალკოჰოლური სასმელების წინააღმდეგ დაწესებულმა შეზღუდვებმა მსხვილი მწარმოებლების გაყიდვებზე უარყოფითად იმოქმედა.
Brand Champions-ის 2026 წლის რეიტინგის მიხედვით, მსოფლიოში ყველაზე გაყიდვადი ვისკის ბრენდების ათეულში გაყიდვების ზრდა მხოლოდ სამმა ბრენდმა აჩვენა. განსაკუთრებით გაუჭირდათ ამერიკულ ბურბონებსა და კანადურ ვისკებს, მაშინ როდესაც ირლანდიურმა Jameson-მა მნიშვნელოვანი წარმატება მოიპოვა და წლის ბრენდ-ჩემპიონის ტიტულიც დაისაკუთრა.
რეიტინგი 2025 წელს გაყიდული 9-ლიტრიანი ყუთების რაოდენობას ეფუძნება.
10. Seagram’s 7 — 2 მილიონი ყუთი
მფლობელი: Diageo | წლიური ცვლილება: 0%
ამერიკული კუპაჟირებული ვისკი ათეულში დაბრუნდა, თუმცა გაყიდვების ზრდა ვერ შეძლო. ზედიზედ მეორე წელია, რეალიზაციის მოცულობა 2 მილიონ ყუთზე ნარჩუნდება. მომხმარებელთა ინტერესის გასაზრდელად ბრენდი ახალი, ვაშლის ღვეზელის არომატის მქონე ვერსიის შეთავაზებას გეგმავს.
9. Torys — 2.5 მილიონი ყუთი
მფლობელი: Suntory Global Spirits | წლიური ცვლილება: +3.6%
იაპონურმა ბრენდმა გაყიდვების ზრდა განაგრძო და რეიტინგში მეცხრე ადგილი შეინარჩუნა. Torys განსაკუთრებით პოპულარულია იაპონიაში. მისი ალკოჰოლის შემცველობა 37%-ია, რაც ევროკავშირის რეგულაციებით ვისკისთვის დადგენილ მინიმალურ 40%-იან ზღვარს ჩამოუვარდება.
8. Maker’s Mark — 2.7 მილიონი ყუთი
მფლობელი: Suntory Global Spirits | წლიური ცვლილება: -0.7%
პრემიუმ-სეგმენტის ამერიკული ბურბონის გაყიდვები მცირედით შემცირდა, თუმცა ბრენდმა რთულ საბაზრო გარემოში პოზიციების შენარჩუნება შეძლო. მომხმარებლებისთვის ახალი შეთავაზებების შესაქმნელად Maker’s Mark-მა პროდუქციის ასორტიმენტი გააფართოვა, მათ შორის, წარმოადგინა პირველი არაბურბონული ვისკი, ხის სპეციალური დაძველების სერია და Los Angeles Dodgers-თან თანამშრომლობით შექმნილი პროდუქცია.
7. Evan Williams — 2.9 მილიონი ყუთი
მფლობელი: Heaven Hill Brands | წლიური ცვლილება: -3.9%
Evan Williams რეიტინგის ათეულში დაბრუნდა, თუმცა ბოლო ხუთი წლის განმავლობაში პირველად გაყიდვების მოცულობამ 3 მილიონ ყუთს ვერ მიაღწია. ამერიკული ბურბონის ინდუსტრიაში არსებული სირთულეების მიუხედავად, მწარმოებელი წარმოების განვითარებას აგრძელებს. კომპანიამ კენტუკიში ახალი საწარმო — Heaven Hill Springs Distillery — აამოქმედა.
6. Kakubin — 4 მილიონი ყუთი
მფლობელი: Suntory Global Spirits | წლიური ცვლილება: +0.2%
იაპონურმა Kakubin-მა წინა პერიოდის ვარდნის შემდეგ გაყიდვები პრაქტიკულად დაასტაბილურა. ბრენდი თავისი გამორჩეული, კვადრატული ბოთლით არის ცნობილი და განსაკუთრებით პოპულარულია აზიის ბაზრებზე. მისი ერთ-ერთი მთავარი გამოყენება Highball-ის კოქტეილია, რომელიც ვისკისა და გაზიანი სასმლისგან მზადდება.
5. Canadian Club — 5.3 მილიონი ყუთი
მფლობელი: Suntory Global Spirits | წლიური ცვლილება: -0.2%
კანადური ვისკის გაყიდვები თითქმის უცვლელი დარჩა. ეს იმ ფონზე მოხდა, როდესაც კანადის რიგმა პროვინციებმა ამერიკული ალკოჰოლური სასმელების გაყიდვა შეზღუდეს და მომხმარებლებს ადგილობრივი პროდუქციის შეძენისკენ მოუწოდეს. მიუხედავად ამისა, Canadian Club-მა ამ ტენდენციით მნიშვნელოვანი სარგებლის მიღება ვერ შეძლო.
4. Crown Royal — 7.9 მილიონი ყუთი
მფლობელი: Diageo | წლიური ცვლილება: -2.1%
კანადური ბრენდის გაყიდვებზე განსაკუთრებით მძიმედ აისახა ამერიკის ბაზარზე მოთხოვნის შემცირება, სადაც რეალიზაცია 9.2%-ით დაეცა. დამატებითი სირთულეები წარმოების საკითხებსაც უკავშირდებოდა: ქარხნის დახურვის გეგმამ ონტარიოს ხელისუფლების უკმაყოფილება გამოიწვია და პროდუქციის ბოიკოტის საფრთხეც გაჩნდა. შექმნილი ვითარების მოსაგვარებლად Diageo-მ დაახლოებით 23 მილიონი კანადური დოლარი გადაიხადა, რათა Crown Royal სავაჭრო ქსელების თაროებზე დარჩენილიყო.
3. Jameson — 11.1 მილიონი ყუთი
მფლობელი: Pernod Ricard | წლიური ცვლილება: +2.2%
ირლანდიურმა Jameson-მა გაყიდვები 2.2%-ით გაზარდა და გლობალური ბაზრის ერთ-ერთ ყველაზე წარმატებულ ბრენდად იქცა. Brand Champions-ის მიხედვით, მან მსოფლიო ვისკის ბრენდ-ჩემპიონის ტიტული მოიპოვა, რომელიც წინა წლებში ამერიკულ ბრენდებს ეკავათ. წარმატებას ხელი შეუწყო მარკეტინგულმა აქტივობებმა და აზიის, აფრიკისა და ლათინური ამერიკის ბაზრებზე გაფართოებამ. მიუხედავად ზრდისა, გაყიდვების მოცულობით Jameson მესამე პოზიციაზეა.
2. Jack Daniel’s — 13.4 მილიონი ყუთი
მფლობელი: Brown-Forman | წლიური ცვლილება: -4.6%
ტენესის ცნობილი ვისკის გაყიდვები 2025 წელს 4.6%-ით შემცირდა. ბრენდისთვის რთული ტენდენცია ახალი არ არის — რეალიზაცია უკვე ზედიზედ მეოთხე წელია კლებულობს. ერთ-ერთ მნიშვნელოვან ფაქტორად კანადის ბაზარზე ამერიკული ალკოჰოლური პროდუქციის წინააღმდეგ დაწესებული შეზღუდვები სახელდება. გაყიდვების შემცირება შეეხო როგორც კლასიკურ Old No. 7-ს, ისე არომატიზებულ ვერსიებს, მათ შორის Honey-სა და Fire-ს.
1. Jim Beam — 16.7 მილიონი ყუთი
მფლობელი: Suntory Global Spirits | წლიური ცვლილება: -4.6%
გაყიდვების შემცირების მიუხედავად, Jim Beam მსოფლიოში ყველაზე გაყიდვადი ვისკის ბრენდად რჩება. 2025 წელს კომპანიამ დაახლოებით 800 000 ყუთით ნაკლები გაყიდა, ხოლო წლის ბრენდ-ჩემპიონის ტიტული Jameson-ს დაუთმო. ამერიკულ ბურბონზე გლობალური მოთხოვნის შენელებამ და სავაჭრო შეზღუდვებმა ბრენდის შედეგებზე უარყოფითად იმოქმედა, თუმცა 16.7 მილიონი ყუთით ის კონკურენტებს კვლავ მნიშვნელოვნად უსწრებს.
