საქართველოს კონკურენციისა და მომხმარებლის დაცვის სააგენტომ დაასრულა მოკვლევა შპს „თინეთსა“ და “თიბისი ბანკს” შორის სავარაუდოდ არსებული ექსკლუზიური შეთანხმების კონკურენციის კანონმდებლობასთან თავსებადობის თაობაზე. სააგენტოს დასკვნით, მოკვლევის ფარგლებში „კონკურენციის შესახებ“ საქართველოს კანონის დარღვევა არ დადასტურდა.
მოკვლევა ეხებოდა "თინეთის" მიერ ადმინისტრირებულ პლატფორმაზე – www.swoop.ge – 2024 წლის ზაფხულის პერიოდში განთავსებულ აქციას, რომელიც ვრცელდებოდა მხოლოდ აღნიშნულ პლატფორმაზე, სასტუმროებისა და განთავსების ობიექტების მომსახურებაზე და მხოლოდ “თიბისის მასტერქარდის” ბარათით გადახდის შემთხვევაში.
საქმეში არსებული მტკიცებულებების საფუძველზე დადგინდა, რომ ეკონომიკურ აგენტებს შორის ექსკლუზიური შინაარსის შეთანხმება არც წერილობითი და არც ზეპირი ფორმით არ არსებობდა.
ამასთან, სააგენტომ “თიბისი ბანკთან” მიმართებით გასცა რეკომენდაცია, რომლის მიხედვითაც სახელშეკრულებო ურთიერთობები უნდა წარიმართოს ისე, რომ პროდუქტისა და მომსახურების მიმღებთათვის არ შეიქმნას გაუმართლებელი ბარიერები, განსაკუთრებით დომინანტური მდგომარეობის პირობებში, ხოლო ექსკლუზიური მიწოდების პირობები გამოყენებულ იქნას მხოლოდ ობიექტურად დასაბუთებულ შემთხვევებში და იყოს პროპორციული.
ინფორმაციას GCCA ავრცელებს.
