დღის TOP 10 საინტერესო ამბავი:
1. ბანკების საკრედიტო პორტფელში უმოქმედო სესხები 6%-ს აჭარბებს - ლიდერი 35.47%-ით „ქართუ ბანკია“
2021 წლის მეორე კვარტლის ფინანსური მაჩვენებლების მიხედვით, უმოქმედო სესხების წილი მთლიან სესხებში ყველაზე მაღალი „ქართუ ბანკშია“, სადაც მილიარდ ლარზე მეტი საკრედიტო პორტფელის 35.47% უმოქმედოა, თუმცა წლიურ ჭრილში „ქართუ ბანკში“ უმოქმედო სესხების მოცულობა მხოლოდ 0.99 პროცენტული პუნქტით არის გაზრდილი.
2. სილამაზის სალონებზე მოთხოვნამ კატასტროფულად იკლო – ბიზნესი გაძლების ზღვარზეა
შექმნილ სიტუაციაში განსაკუთრებით წვრილ კომპანიებს გაუჭირდათ, ზოგი გაკოტრების ზღვარზე, ზოგიც უკვე დაიხურა და საქმიანობას ჯერჯერობით ვერ აგრძელებს.
3. რესტორნებს დღეიდან 23:00 საათამდე შეეძლებათ მუშაობა – რას შეცვლის რეგულაციების 1–საათიანი შერბილება სექტორში
სარესტორნო ინდუსტრიის წარმომადგენლები ,,კომერსანტთან“ ამბობენ, რომ შეზღუდვების შემსუბუქება მომხმარებელს წაახალისებს და გაზრდის აქტიურობას.
4. როგორ აღარიბებს ინფლაცია ადამიანს - ფასების რეალური ზრდის დონე შესაძლოა ოფიციალურს აჭარბებდეს
ინფლაციის განაკვეთი ორნიშნა მაჩვენებელზე ნარჩუნდება. სექტემბერში მან 12.3%-ს მიაღწია, რაც სამიზნე მაჩვენებელს 4-ჯერ აღემატება, თუმცა ცალკეულ პროდუქტებზე ფასები გაცილებით მეტად 50, 60 და 150 პროცენტით გაიზარდა.
5. სომხეთში $13,5–მილიონიან ტენდერში გამარჯვებული ქართული კომპანია ხიდების მშენებლობას წელს დაასრულებს
მაშინ, როცა უცხოური სახელმწიფო კომპანიები გზებს საქართველოში აშენებენ, საქართველოს მთავრობა კი ქართულ კომპანიებს მასშტაბური პროექტების განხორციელების გამოცდილებას უწუნებს, „კავკასუს როუდ პროჯექტი“ ინფრასტრუქტურულ პროექტს საზღვარგარეთ ახორციელებს. კომპანიის დამფუძნებელი და გენერალური დირექტორის პაატა ტრაპაიძე გვიყვება, რომ სომხეთში 255 მეტრი სიგრძის 2 ახალი ხიდის მშენებლობა წლის ბოლომდე დასრულდება.
6. პური შესაძლოა 10-15 თეთრით გაძვირდეს
გლობალურ ბაზრებზე ხორბლის გაძვირების შემდეგ პურპროდუქტების ბაზარზე პურის გაძვირების საკითხი კიდევ ერთხელ დაისვა. როგორც მწარმოებლები ამბობენ, ბოლო დღეების განმავლობაში ფქვილი 5 ლარით გაუძვირდათ. ამასთან, მოიმატა ყველა ნედლეულის ფასმა, რაც პურის წარმოებაში გამოიყენება. შესაბამისად, ცვლილება სავარაუდოდ პურის ფასსაც შეეხება.
7. ქუთაისის აეროპორტში მგზავრთნაკადის მოცულობა პანდემიამდელი მაჩვენებლის 48%-ს შეადგენს
სექტემბრის თვეში, 2019 წლის ანალოგიურ პერიოდთან შედარებით, დავით აღმაშენებლის სახელობის აეროპორტში მგზავრთნაკადის 48% აღდგა. 2021 წლის სექტემბერში, ქუთაისის საერთაშორისო აეროპორტი 43,926 მგზავრს მოემსახურა. (2019 სექტემბერი - 91,713 მგზავრი).
8. ევროპაში გაზი უკვე $1900 ღირს
ბუნებრივი გაზის ნოემბრის ფიუჩერსის ფასმა ოთხშაბათს დღისით ბირჟაზე ICE Futures 1 მვტ/სთ–ზე 161 ევროს მიაღწია, რაც 1000 კუბურ მეტრზე $1924–ს ნიშნავს. ოთხშაბათსავე, 6 ოქტომბერს დილით ათასი კუბური მეტრის ფასი $1500–ს შეადგენდა.
9. თურქეთში პანდემიის მორიგი ტალღა აგორდა
კოვიდის მორიგმა ტალღამ, ამჯერად დელტა-შტამმა, მთელი თურქეთი მოიცვა - დღე-ღამეში დაინფიცირებულთა რაოდენობამ 30 000-ს, სიკვდილიანობამ კი 230-240–ს მიაღწია.
10. Forbes: IT-გიგანტების აქციების ფასი მკვეთრად შემცირდა
Facebook, Amazon, Apple, Netflix და Alphabet-ის აქციების ფასის ჩამოშლის შემდეგ ამერიკულ ბაზრებზე სხვა მსხვილი კომპანიების კაპიტალიზაციაც მკვეთრად შემცირდა. ყველა კომპანიას ამის თავისი მიზეზები გააჩნია, თუმცა ინვესტორები ამაში დიდი სურათის ნაწილს ხედავენ და უახლოეს თვეებში არასტაბილურობას პროგნოზირებენ.