გლობალურ ბაზრებზე ხორბლის გაძვირების შემდეგ პურპროდუქტების ბაზარზე პურის გაძვირების საკითხი კიდევ ერთხელ დაისვა. როგორც მწარმოებლები ამბობენ, ბოლო დღეების განმავლობაში ფქვილი 5 ლარით გაუძვირდათ. ამასთან, მოიმატა ყველა ნედლეულის ფასმა, რაც პურის წარმოებაში გამოიყენება. შესაბამისად, ცვლილება სავარაუდოდ პურის ფასსაც შეეხება.
შექმნილ სიტუაციაში ერთადერთი გამოსავალი სუბსიდიაა, მაგრამ მწარმოებლებს ამასთან დაკავშირებითაც არაერთგვაროვანი მოსაზრება აქვთ.
პურის მწარმოებელთა ასოციაციის ხელმძღვანელის მალხაზ დოლიძის განცხადებით, პურის თვითღირებულების ხარჯი მკვეთრად გაზრდილია, რის ფონზეც ფასის შენარჩუნება ჭირს და ის აუცილებლად გადაიხედება.
,,საერთაშორისო ბაზრებზე ხორბალი ძვირდება. ამას ვერაფერს ვუხერხებთ, წარმოება არ გვაქვს და 80-85%-ით იმპორტზე ვართ დამოკიდებული. წისქვილები არ ჩანან, ჩვენ, პურის მწარმოებლები აღმოვჩნდით ყველაზე რთულ სიტუაციაში. პური სოციალური პროდუქტია, არჩევნები იყო და შევეცადეთ ფასს არ შევხებოდით, მაგრამ ასე გაგრძელებაც არ შეიძლება. რუსეთმა ხორბლის ექსპორტი გააძვირა. საქართველოში ისედაც ფქვილის ფასის 5-ლარიანი ზრდაა და ტენდენცია გაგრძელდება. შესაბამისად, პურიც 10-15 თეთრის ფარგლებში გაძვირდება. აქედან გამომდინარე, სუბსიდია გახდება აუცილებელი. მთავრობა ამბობდა, რომ რაღაც ეტაპზე გადაწყვეტილების მიღება გახდებოდა საჭირო და ახლა დადგა ეს დრო“, - ამბობს ,,კომერსანტთან“ მალხაზ დოლიძე.
თუმცა განსხვავებული მოსაზრებისაა მწარმოებელთა ნაწილი. ,,თემქის პურის“ დირექტორი დალი კუპატაძე ამბობს, რომ სუბსიდია ქარხნებს არათანაბარ გარემოში ჩააყენებს, ამიტომ კატეგორიული წინააღმდეგია, მთავრობამ ამ მოდელის შემოღებაზე იმსჯელოს.
,,წარმოების ხარჯი არის საგრძნობლად გაზრდილი. მოიმატა როგორც ენერგომატარებლების ფასმა, ასევე ნედლეულიც გაგვიძვირდა - ფქვილი, საფუარი, წყალი, მარილი, ყველაფერი, რაც წარმოებაში გამოიყენება. შექმნილი სიტუაცია ძალიან გვაზარალებს. ვფიქრობთ, რომ პური გაძვირდება, ფასის შენარჩუნება რეალურად შეუძლებელია. მიუხედავად ამისა, სუბსიდიას მკვეთრად ვემიჯნებით. ცუდ მდგომარეობაში აღმოჩნდებიან საწარმოები, ზოგი ისარგებლებს ამ შეღავათით, ზოგი არა, პურის ბაზრის მოთამაშეებს სერიოზულ პრობლემას შეუქმნის, რადგან ამ შეღავათს ყველა ვერ მიიღებს“, - აცხადებს დალი კუპატაძე ,,კომერსანტთან“.
ცნობისთვის, ამ ეტაპზე 1 ბუშელი ფქვილის ფასი გლობალურ ბაზრებზე 7,56 ცენტია. რაც შეეხება 1 ტომარა ფქვილის ფასს საქართველოში, 72 ლარია, როცა სექტემბერში ფასი 67 ლარის ფარგლებში იყო. რაც შეეხება უმაღლესი ფქვილის ღირებულებას, ფასმა 80 ლარს მიაღწია.
ცხადია, ტენდენცია გაგრძელდება, რასაც განაპირობებს ის გარემოებაც, რომ რუსეთმა ხორბლის საექსპორტო გადასახადი ტონაზე 57 დოლარით გაზარდა.
რაც შეეხება სუბსიდიას, შეგახსენებთ, რომ მთავრობის გადაწყვეტილებით, ხორბლის ფქვილის სუბსიდირების სახელმწიფო პროგრამა 2021 წლის 30 ივნისამდე გრძელდებოდა.
პროგრამის ფარგლებში, ერთ 50 კილოგრამიან ტომარა პირველი ხარისხის ხორბლის ფქვილზე სუბსიდიის მოცულობა შეადგენს არაუმეტეს 20 ლარს.
სუბსიდიის შედეგად, ბენეფიციარი ვალდებული იყო ერთი 50 კილოგრამიანი ტომარა სუბსიდირებული პირველი ხარისხის ხორბლის ფქვილის რეალიზაცია მოეხდინა არაუმეტეს 53 ლარად.