სილამაზის სალონების საქმიანობაზე პანდემიამ უმძიმესი გავლენა მოახდინა. როგორც ამ ბიზნესის წარმომადგენლები ,,კომერსანტთან“ აცხადებენ, მოთხოვნა თითქმის მასიურად შემცირდა, ხოლო ხარჯი გაზრდილია, რასაც ბიზნესის ნაწილი რთულად უმკლავდება. შექმნილ სიტუაციაში განსაკუთრებით წვრილ კომპანიებს გაუჭირდათ, ზოგი გაკოტრების ზღვარზე, ზოგიც უკვე დაიხურა და საქმიანობას ჯერჯერობით ვერ აგრძელებს.
სილამაზის სალონი ,,კრისტალის“ ინფორმაციით, მოთხოვნა თითქმის 90%-ით შემცირდა, რაც გაკოტრების ტოლფასია კომპანიისთვის.
,,უმძიმეს მდგომარეობაში აღმოვჩნდით. უსაფრთხოების წესების მაქსიმალურად დაცვით ვაგრძელებთ მუშაობას. ამ მხრივ პრობლემა არ არის, თუმცა პანდემიამ გარკვეული დისკომფორტი შექმნა, კლიენტების რაოდენობა მუდმივად მცირდება და უკვე 90%-იან მაჩვენებელზეა. ცხადია, ამან თანამშრომლების კლებაც გამოიწვია, იძულებული გავხდით, რამდენიმე კადრი გაგვეშვა. თავიდან რეგულაციების დაცვა დიდ ხარჯს ითხოვდა, თუმცა ჰიგიენური საშუალებების და დამცავი მოწყობილობების ფასი თანდათან დარეგულირდა და ამან მცირე შეღავათი მოგვცა. ჯამში, 15%-ით გაგვეზარდა ხარჯი, თუმცა მთავარია, რომ მაღალი სტანდარტის გამო ყველა - თანამშრომელიც და კლიენტიც თავს უსაფრთხოდ გრძნობს და იცის, რომ სილამაზის სალონში სტუმრობით კორონავირუსის გადადების საფრთხე არ ემუქრება“, - ამბობს სილამაზის სალონ ,,კრისტალის“ ცენტრის დირექტორი ნატო შარიქაძე ,,კომერსანტთან“.
კომპანია ,,დაიმონდის“ მენეჯერის ირმა სარალიძის თქმით, მოთხოვნა დაახლოებით 30%-ით შემცირდა და ესეც მხოლოდ იმის ხარჯზე, რომ სერვისი არ გაუძვირებიათ.
,,შევეცადეთ, ფასები შეგვენარჩუნებინა. ამან მცირედით მაინც წაახალისა მომხმარებელი, თუმცა კლება მაინც არის, ჩვენს შემთხვევაში, მოთხოვნა 30%-ით შემცირდა. ლოკდაუნების დროს უფრო მძიმე სიტუაცია იყო. რა პირობებიც არ უნდა შესთავაზო მომხმარებელს, ხალხი სილამაზის სალონების მომსახურებისგან მაინც თავს იკავებს, ალბათ იმის გამოც, რომ შემოსავლები შემცირდა და შედარებით ძვირადღირებული პროცედურების ჩატარებისგან თავს იკავებენ“, - ამბობს სარალიძე.
სილამაზის სალონმა ,,მონე“ პანდემიის გამო საქმიანობა დროებით შეაჩერა.
,,მოთხოვნა თითქმის აღარ იყო, ამიტომ დროებით ტაიმ-აუტის აღება ვარჩიეთ. დაახლოებით თვენახევარში გავაგრძელებთ საქმიანობას. ამ ეტაპზე ძალებს ვიკრებთ. პანდემიით გამოწვეული ზარალი დიდია, ქვეყანა უნდა დალაგდეს და ვირუსის გავრცელების საფრთხე მინიმუმამდე შემცირდეს, სხვა პირობებში ბიზნესს ძალიან გაუჭირდება“, - ამბობს ნანა ომანაძე, „მონეს“ წარმომადგენელი.
როგორც აღმოჩნდა, დიდად არც იმ კომპანიებს გაუმართლა, ვინც სტრატეგია შეცვალა და მომხმარებელს გამოძახების სერვისი შესთავაზა.
ერთ-ერთი ასეთია სილამაზის სალონი ,,ბიუთი ექსპრესი“.
,,ვმუშაობთ როგორც გამოძახებით, ასევე სალონშიც ვიღებთ მომხმარებლებს, მაგრამ ორივე სეგმენტში რთული სიტუაციაა. კადრებს ჯერჯერობით ვინარჩუნებთ, თუმცა მუშაობა ძალიან გვიჭირს. ციფრებს ვერ დავაკონკრეტებთ, თუ რა მაჩვენებლით შემცირდა მოთხოვნა, ფაქტია, რომ ბიზნესში დიდი პრობლემაა და სანამ პანდემიის გავრცელების საფრთხე არ გადაივლის, სალონებში არსებული სიტუაციის გაუმჯობესება მარტივი არ იქნება“, - ამბობს სალონის მენეჯერი ნონა ჟამიერაშვილი ,,კომერსანტთან“.
ცნობისთვის, უწყებათაშორისი საკოორდინაციო საბჭოს გადაწყვეტილებით, ქვეყნის მასშტაბით შეზღუდვები 2020 წლის 28 ნოემბრიდან გამკაცრდა. covid-19-ის გავრცელების რისკიდან გამომდინარე, სილამაზის სალონებს საკმაოდ მკაცრი რეგულაციები დაუწესდათ.
თუმცა, საქართველოს მთავრობის დადგენილებით, საქართველოში 16 იანვრიდან კორონავირუსის პანდემიის გამო დაწესებული შეზღუდვების ნაწილი მოიხსნა ან შერბილდა. ცვლილება სილამაზის სალონების საქმიანობასაც შეეხო.
მარი ჩიტაია