ონლაინ-სესხების ბიზნესი ბანკებმა წაიღეს?! – “ბანკები ალტერნატიული ფულის წყაროს კლავენ“

access_time2017-09-28 09:00:57

 

სასესხო პროდუქტს, რომელიც ქართულ საფინანსო ბაზარზე ონლაინ–სესხების გამცემმა კომპანიებმა შემოიტანეს და რომელიც წლების განმავლობაში საკმაოდ წარმატებულადაც მუშაობდა, დღეს მომხმარებელს უკვე ქართული კომერციული ბანკებიც სთავაზობენ. საუბარია სწრაფ, მაღალპროცენტიან ონლაინ სესხებზე.

 

კომერციული ბანკების ნაწილმა მომხმარებლისთვის სწრაფი სესხის შეთავაზება აქტიურად დაიწყო. სესხის დამტკიცება ხშირ შემთხვევაში წინასწარ ხდება, ზოგჯერ კი მომხმარებელს სპეციალური აპლიკაციის შევსება უწევს. სწრაფი სესხი ძირითადად 1000 ლარამდე გაიცემა, სესხის დაფარვის ვადა კი ერთ წელიწადია. ასეთი კრედიტის წლიური ეფექტური საპროცენტო განაკვეთი 81–96%–ის ფარგლებში მერყეობს. სესხის გაცემის საკომისო საშუალოდ 50–60 ლარს შეადგენს. აღსანიშნავია ისიც, რომ ამ ერთი წლის განმავლობაში იფარება მხოლოდ პროცენტი, ერთი წლის შემდეგ კი კლიენტს ძირი თანხის გადახდის ვალდებულება აქვს.

 

 

გთავაზობთ ერთ–ერთი კომერციული ბანკის მიერ შეთავაზებულ პირობებს სწრაფ სესხზე:

 

სესხის მოცულობა 1000 ლარი

 

გასატანი თანხის მოცულობა – 950 ლარი

 

კრედიტის საკომისიო – 50 ლარი

 

ყოველთვიური შენატანი  – 50 ლარი

 

ვადაგადაცილების ყოველდღიური ჯარიმა – 4,1 ლარი

 

შენატანის ჯამური ოდენობა – 1 600 ლარი

 

სესხის წლიური ეფექტური საპროცენტო განაკვეთი 81,62%

 

აღსანიშნავია, რომ ყოველთვიურ შენატანში იგულისხმება მხოლოდ სესხით მომსახურების ყოველთვიური საკომისიო,  სესხის ვადის ბოლოს შესატანი თანხა იანგარიშება - სესხით მომსახურების ყოველთვიური საკომისიოს დამატებული ძირითადი თანხა.

 

ეს არის ერთი კომერციული ბანკის მაგალითი სესხის ერთ კონკრეტულ მოცულობაზე, სხვა ბანკებს წლიური საპროცენტო განაკვეთი უფრო მაღალი აქვს, როგორც უკვე აღვნიშნეთ, ის 96%–მდეც კი ადის.

 

„კომერციულმა ბანკებმა რეალურად მიიღეს უკვე გამზადებული ბაზარი და გამზადებული პროდუქტი. იმისათვის, რომ ახალი პროდუქტი შეექმნათ, სპეციალური კვლევა უნდა ჩაეტარებინათ. ახლა ამ კვლევის აუცილებლობა არ არსებობს, რადგან აქვთ დროში გამოცდილი პროდუქტი. უბრალოდ, შეფუთეს და გამოუშვეს ბაზარზე, ანუ გაიიოლეს საქმე“, – აცხადებს „კომერსანტთან“ საუბრისას ფინანსისტი ირაკლი ბერძენაძე.

 

მისივე თქმით, კომერციული ბანკები  ბაზარზე პროდუქტის – სწრაფი ონლაინ სესხის გამოტანით გადავიდნენ რისკიანი სესხების დაფინანსებაზე. ამით კი, ბერძენაძის თქმით, რეალურად ბანკი არაფერს კარგავს, რადგან ერთის მხრივ ის იბრუნებს კლიენტებს, რომლებსაც ჰქონდათ პარალელური სესხი და მუშაობს პრინციპით – „ჰქონდეს ვალი კლიენტს მხოლოდ მასთან“.

 

„ამით კომერციული ბანკი სწრაფი სესხების კომპანიებს არათუ კლიენტებს, არამედ უკვე ჯანსაღ პორტფელს ართმევს. ონლაინ–სესხების კომპანიებს ჰქონდათ თავისი ჯანსაღი პორტფელი და ჰყავდათ კლიენტურა, რომელსაც უკვე ბანკი წაიყვანს და ბანკი მიიღებს სარგებელს ამ ყველაფრით. რეალურად,  ბანკები ალტერნატიული ფულის წყაროს კლავენ“, – განაცხადა ბერძენაძემ.

 

მისივე თქმით, აუცილებელია, რომ ამ პროცესში ეროვნული ბანკი ჩაერთოს. „რეგულატორმა უნდა გაითვალისწინოს წვრილი გამსესხებელი კომპანიების ინტერესები და ბანკებს გარკვეული შეზღუდვა უნდა დაუწესოს თუნდაც საპროცენტო განაკვეთებზე, რადგან თუ ბანკიც და წვრილი გამსესხებელიც ერთ პროცენტში (მაღალში) გასცემს სესხს, მაშინ აქ უკვე კონკურენციაზე ფიქრი ზედმეტია“, – განაცხადა ბერძენაძემ.

 

 

კომერსანტი

 

 




[~similar~]