Financial Times-ის ცნობილი პოლიტიკური მიმომხილველი გიდეონ რაჰმანი სტატიაში „ტრამპი, პუტინი და ხანმოკლე ომის ილუზია“ აშშ-ისა და რუსეთის პრეზიდენტების მიერ დაშვებულ სამხედრო-პოლიტიკურ შეცდომებს აანალიზებს და ჩინეთის ლიდერს, სი ძინპინს აფრთხილებს, რომ მათ გამოცდილებაზე უნდა ისწავლოს.
ავტორის შეფასებით, დონალდ ტრამპმა და ვლადიმერ პუტინმა სამხედრო კონფლიქტების დაწყებისას მათი სწრაფად დასრულების შესაძლებლობა სათანადოდ ვერ შეაფასეს. ორივე ლიდერი, სხვადასხვა გარემოებისა და მიზნების მიუხედავად, ომის დაწყებისას, როგორც ჩანს, ვარაუდობდა, რომ სამხედრო უპირატესობა მოწინააღმდეგის სწრაფად დამარცხებას უზრუნველყოფდა. თუმცა მოვლენების განვითარებამ აჩვენა, რომ საწყისი გათვლები რეალობას არ დაემთხვა.
რაჰმანი ყურადღებას ამახვილებს იმ გარემოებაზე, რომ ომის დაწყება გაცილებით მარტივია, ვიდრე მისი დასრულება სასურველი შედეგით. სამხედრო ოპერაციის წარმატება მხოლოდ შეიარაღების უპირატესობაზე არ არის დამოკიდებული – მნიშვნელოვანია მოწინააღმდეგის წინააღმდეგობის უნარი, პოლიტიკური ნების სიმტკიცე, საერთაშორისო მხარდაჭერა და კონფლიქტის შესაძლო ეკონომიკური შედეგებიც.
სტატიის მთავარი გზავნილი ჩინეთის ლიდერს ეხება. ავტორი მიიჩნევს, რომ თუ სი ძინპინი ტაივანის წინააღმდეგ სამხედრო მოქმედების დაწყების შესაძლებლობას განიხილავს, მან აშშ-ისა და რუსეთის გამოცდილება აუცილებლად უნდა გაითვალისწინოს. ტაივანის წინააღმდეგ ოპერაცია შესაძლოა, სწრაფი გამარჯვების ნაცვლად ხანგრძლივ კონფლიქტში გადაიზარდოს და ჩინეთისთვის მძიმე სამხედრო, ეკონომიკური და პოლიტიკური შედეგები მოიტანოს.
რაჰმანის შეფასებით, ტრამპისა და პუტინის გამოცდილება მნიშვნელოვანი გაფრთხილებაა ნებისმიერი ლიდერისთვის, რომელიც ფიქრობს, რომ სამხედრო ძალის გამოყენებით პოლიტიკური მიზნების სწრაფად მიღწევას შეძლებს. ტაივანის საკითხზე ჩინეთის გადაწყვეტილებამ კი შესაძლოა, არა მხოლოდ რეგიონის, არამედ საერთაშორისო უსაფრთხოების გარემოზეც მნიშვნელოვანი გავლენა მოახდინოს.
