აშშ-ის პრეზიდენტის, დონალდ ტრამპის ადმინისტრაცია ლიეტუვისგან მოითხოვს, ევროპული სანქციების მიუხედავად, ბალტიის ზღვის ცენტრალური პორტი ბელარუსული პოტაშის (კალიუმის სასუქის) ექსპორტისთვის გახსნას. ამ ნაბიჯით ვაშინგტონი მიზნად ისახავს კრიტიკულად მნიშვნელოვანი სასუქის კომპონენტზე კანადაზე დამოკიდებულების შემცირებასა და ამერიკელი ფერმერებისთვის ხარჯების შემცირებას. ინფორმაციას POLITICO ავრცელებს.
POLITICO წერს, რომ ოთხი ევროპელი ოფიციალური პირის ცნობით, აშშ-ის სპეციალურმა წარმომადგენელმა ბელარუსის საკითხებში, ჯონ კოულმა, ბოლო კვირებში ლიეტუველ დიპლომატებთან ბელარუსულ საქონელზე დაწესებული ბლოკადის შემსუბუქების შესაძლებლობა განიხილა. აღნიშნული შეზღუდვები ევროკავშირის მასშტაბით მოქმედი იმ სანქციების ნაწილია, რომლებიც ალექსანდრე ლუკაშენკოს მთავრობას უკრაინასთან ომში რუსეთის მოკავშირეობის გამო დაწესდა. სასჯელაღსრულებითი ზომები ევროკავშირის პორტებს ბელარუსული საქონლის გადაზიდვას უკრძალავს, თუმცა სანქციების ვადა ყოველ 12 თვეში ერთხელ უნდა გაგრძელდეს.
ლიეტუვას, რომელიც წლის დასაწყისში ევროკავშირის როტაციულ თავმჯდომარეობას გადაიბარებს, თეორიულად შეუძლია ვეტო დაადოს სანქციების მორიგ გაგრძელებას, რომელიც თებერვალშია დაგეგმილი. თუმცა, ლიეტუვა უკრაინის ერთ-ერთი ყველაზე მტკიცე მოკავშირეა ევროკავშირში.
გასულ თვეში პრეზიდენტმა ტრამპმა განაცხადა, რომ მინსკთან მუშაობდა "მასშტაბურ გარიგებაზე" პოტაშის შესაძენად "ბევრად დაბალ ფასად", ვიდრე ფერმერები ამჟამად კანადურ კომპანიებს უხდიან. თუმცა, ეს გარიგება დამოკიდებულია სასოფლო-სამეურნეო პროდუქციის ტრანსპორტირებაზე ბალტიის ზღვაზე მდებარე ლიეტუვის კლაიპედას მთავარი პორტის, ან რეგიონის სხვა პორტების გავლით.
"ბოლო კვირებში დონალდ ტრამპის გუნდის მხრიდან ლიეტუველებთან კომუნიკაცია საგრძნობლად ინტენსიური გახდა", — ამის შესახებ POLITICO-ს წყარომ განუცხადა, რომელიც მოლაპარაკებების დეტალებს იცნობს.
POLITICO წერს, რომ აშშ-ის სახელმწიფო დეპარტამენტს კომენტარის გაკეთების მოთხოვნაზე პასუხი არ გაუცია
