Tesla-ს Cybertruck-ის ყიდვის ხელშეკრულებაში ახალი პუნქტი გაჩნდა. სადაც ნათქვამია, რომ ავტომწარმოებლის პირდაპირი ნებართვის გარეშე მყიდველებს არ შეუძლიათ თავიანთი Cybertruck-ის გაყიდვა პირველი წლის განმავლობაში, წინააღმდეგ შემთხვევაში დაჯარიმდებიან.
გამოცემა Engadget-ი წერს, რომ თუ მყიდველები გაყიდვის დებულებას დაარღვევენ, Tesla-მ შეიძლება ავტომობილის მესაკუთრისთვის საკუთრების უფლების ჩამორთმევა მოითხოვოს ან ხელშეკრულების დამრღვევებს $50,000-ის ოდენობით ჯარიმა დაეკისრებათ.
დოკუმენტში ასევე ნათქვამია, რომ ამ ახალი პუნქტის დამრღვევებს მომავალში შესაძლოა საერთოდ აეკრძალოთ Tesla-ს მანქანების შეძენა.
Tesla ამბობს, რომ გამონაკლისი დაიშვება მათთვის, ვისაც Tesla-სგან წერილობითი თანხმობა ექნებათ ავტომობილის გაყიდვაზე.
Tesla-ს Cybertruck-ი ჯერ მხოლოდ რამდენიმე მომხმარებელს მიეწოდება და მასობრივ წარმოებაში 2024 წლამდე არ იქნება.
