ევროპის უმსხვილესმა დაბალბიუჯეტიანმა ავიაკომპანია Ryanair-მა 2025 წლის აპრილიდან ივნისამდე პერიოდის ფინანსური ანგარიში გამოაქვეყნა, რომელიც ერთი შეხედვით უცნაურ დასკვნას გვთავაზობს: ბიუჯეტური ავიაკომპანიის ბორტზე ფრენები სულ უფრო და უფრო ნაკლებად ბიუჯეტური ხდება.
ანგარიშის მიხედვით, საშუალო ტარიფი 21%-ით გაიზარდა გასული წლის ანალოგიურ პერიოდთან შედარებით და 51 ევრო შეადგინა. თუმცა, თუ ამას დავუმატებთ ხელბარგის, ადგილის შერჩევის და სხვა მომსახურების დამატებით გადასახადებს, ცალმხრივი ფრენის საშუალო ღირებულებამ 75 ევროს მიაღწია.
ავიაკომპანიის განმარტებით, ფასების ზრდაზე გავლენა მოახდინა აპრილში აღდგომის სრულმა დღესასწაულებმა, გასული წლის დაბალმა საბაზო მაჩვენებელმა და მაღალმა მოთხოვნამ, რაც სეზონის ბოლოს ბილეთების უფრო მაღალ ფასებს ნიშნავს.
საერთო ჯამში, 2025 წლის აპრილიდან ივნისამდე, Ryanair-მა 57.9 მილიონი მგზავრი გადაიყვანა. ავიაკომპანიამ ბილეთებიდან 2.9 მილიარდი ევრო გამოიმუშავა, ხოლო დამატებითი მომსახურებიდან – 1.39 მილიარდი ევრო, რაც საშუალოდ 24 ევროს შეადგენს ერთ ადამიანზე.
Ryanair-ის ბიზნეს მოდელი აჩვენებს, რომ ყოველ მესამე ევროს ავიაკომპანია არა თავად ბილეთებიდან, არამედ „დამატებებიდან“ იღებს – ესენია პრიორიტეტული ჩასხდომა, ხელბარგისა და ბარგის გადაზიდვა, და ა.შ. ეს მგზავრობას „იაფიდან“ შედარებით ხელმისაწვდომამდე აქცევს.
ვებგვერდზე მითითებული 10-20 ევროს ფასი მხოლოდ დასაწყისია. ჩემოდნის წაღება, ილუმინატორთან ადგილის არჩევა ან ბორტზე სენდვიჩის ჭამა — ეს ყველაფერი დამატებითი საფასურის სანაცვლოდ ხდება.
დამატებითი სერვისების დინამიური ფასების სისტემა ართულებს დაგეგმვას. ახლა, ბარგის ან ხელბარგის გადაზიდვა, თუნდაც ერთი მარშრუტით, ფიქსირებულ ფასად აღარ იყიდება. მომსახურების ღირებულება მოთხოვნასთან არის დაკავშირებული — რაც უფრო მაღალია ის, მით უფრო ძვირი დაჯდება ჩემოდნის გადაზიდვა.
და მიუხედავად იმისა, რომ ევროპაში 75 ევროს ღირებულების ბილეთი მაინც შეიძლება მომგებიანი იყოს, პრაქტიკაში, დაბალბიუჯეტიანი ავიაკომპანიების ფასი სულ უფრო მაღალია, ვიდრე კლასიკური ავიაკომპანიების ფასი, რომლებსაც მომსახურების ფართო სპექტრი აქვთ.
