მსოფლიო ბანკი (WB) 2023 წელს ენერგომატარებლებზე მსოფლიო ფასების 26%-ით კლებას პროგნოზირებს. ამის შესახებ ნათქვამია მსოფლიო ბანკის აპრილის ანგარიშში „სასაქონლო ბაზრების პერსპექტივები“, რომელიც ხუთშაბათს გამოქვეყნდა.
„ფასებზე პროგნოზი მკვეთრად შემცირდა. ენერგომატარებლებზე ფასების ინდექსი, სავარაუდოდ, 26%-ით დაიკლებს 2023 წელს და უცვლელი დარჩება (0,1%) 2024 წელს“, - აღნიშნავენ მოხსენების ავტორები.
ამავდროულად, ოქტომბრის ანგარიშში ნავარაუდები იყო, რომ 2023 წელს მსოფლიოში ენერგიის ფასები 11%-ით შემცირდებოდა 2022 წელს 60%-იანი ნახტომის შემდეგ.
მსოფლიო ბანკის პროგნოზით, 2023 წელს ერთი ბარელი Brent ნავთობის ფასი საშუალოდ 84 დოლარი იქნება, თუმცა წინა პროგნოზით უფრო მაღალი ფასი - 92 დოლარი იყო ნავარაუდები.
„გლობალური მოთხოვნის შესუსტებამ უკვე გამოიწვია ფასების 15%-ით დაწევა 2022 წლის საშუალო მაჩვენებელთან შედარებით და, სავარაუდოდ, ამ დონეზე დარჩება 2024 წლის ბოლომდე“, - ნათქვამია მოხსენებაში.
დოკუმენტში ასევე ნათქვამია, რომ ჩინეთის ეკონომიკური აღდგენა ხელს შეუწყობს ნავთობზე მოთხოვნის ზრდას 2023-2024 წლებში. მიწოდება უფრო ნელა გაიზრდება OPEC+ ნავთობის მოპოვების კვოტებისა და „სხვა რეგიონების უმეტესობაში სიმძლავრის შეზღუდვის“ გამო. 2023 წელს ნავთობის მოხმარება 2%-ით გაიზრდება, რაც ყველა დროის ახალ მაქსიმუმს შეადგენს 101,9 მილიონ ბარელს დღეში. 2023 წელს ნავთობის მოპოვება 1,2%-ით გაიზრდება, ეს ზრდა „ძირითადად“ გამოწვეულია უფრო მაღალი წარმოებით აშშ-ში, ბრაზილიაში, კანადასა და ნორვეგიაში.
