შვებულებაში გამგზავრებულ მადრიდელებს ოთახის მცენარეების სპეციალურ სასტუმროში დატოვება შეუძლიათ, სადაც მათ პროფესიონალები მოუვლიან.
უჩვეულო სერვისი იმდენად პოპულარული აღმოჩნდა, რომ გახსნიდან მალევე ყველა ადგილი შეივსო და სასტუმრომ ახალი „სტუმრების“ მიღება დროებით შეწყვიტა.
მცენარეთა სასტუმრო საზოგადოებრივ ცენტრ Infinito Delicias-ში ფუნქციონირებს. პროექტი იმ ადამიანებისთვის შეიქმნა, რომლებსაც მოგზაურობის დროს მცენარეების მოსარწყავად ვერავის უტოვებენ. ეს განსაკუთრებით რთულია ზაფხულში, როდესაც სიცხის გამო ბინები ძლიერ ცხელდება და ქოთნებში მიწა სწრაფად შრება.
მცენარეები შვებულებას გრილ სივრცეში, ცენტრის თანამშრომლების მეთვალყურეობის ქვეშ ატარებენ. მომსახურება სრულიად უფასოა. მფლობელებს მხოლოდ ქოთნის შესაბამის სადგამთან ერთად მიტანა მოეთხოვებათ, რათა მორწყვის დროს წყალი მეზობლად განთავსებულ მცენარეებზე არ გადავიდეს.
მცენარეების დატოვება და დაბრუნება ოთხშაბათობით, 18:30-დან 20:30 საათამდეა შესაძლებელი. ამ პერიოდში ადგილზე იმყოფება თანამშრომელი, რომელიც მცენარეებს იღებს, მფლობელებს უბრუნებს და მათი მოვლის შესახებ კითხვებს პასუხობს.
სასტუმრო მცენარეების მიღებას მთელი ზაფხულის განმავლობაში გეგმავს, როგორც კი ადგილები გათავისუფლდება. მცენარეების უკან წაყვანა არაუგვიანეს 12 სექტემბრისა იქნება საჭირო. ორგანიზატორებს არ დაუზუსტებიათ, რამდენი ქოთანი განთავსდა ცენტრში.
გახსნის დღეს სტუმრებისთვის პრაქტიკული გაკვეთილიც ჩატარდა. მათ აუხსნეს, როგორ უნდა მოირწყას და მოვლილ იქნეს სხვადასხვა სახეობის მცენარე ძლიერი სიცხის დროს. მსგავსი კონსულტაციები ოთხშაბათობით მომავალშიც გაგრძელდება.
Infinito Delicias ყვავილების მაღაზია ან კომერციული მომსახურება არ არის. ეს 2025 წლის ბოლოს გახსნილი საზოგადოებრივი ცენტრია, რომელიც კულტურულ და ეკოლოგიურ პროექტებს, თანამედროვე ხელოვნებას, ურბანულ მიწათმოქმედებასა და ექსპერიმენტულ სამზარეულოს აერთიანებს.
ზაფხულში ცენტრი უფასო კლიმატური თავშესაფრის ფუნქციასაც ასრულებს. მადრიდის მცხოვრებლებს შეუძლიათ სიცხეს აქ შეაფარონ თავი, რამდენიმე საათით გრილ გარემოში დარჩნენ, წაიკითხონ, იმუშაონ ან დაისვენონ.
შენობაში 160 კვადრატული მეტრის შიდა ბაღები და ბოსტნებია მოწყობილი. 2023 წელს ცენტრის შენობამ მდგრადი არქიტექტურის ერთ-ერთი გამორჩეული პროექტის სტატუსით ევროპული Holcim Awards-ის ოქროს ჯილდოც მიიღო.
