პორტუგალიელი ფეხბურთელი კრიშტიანუ რონალდუ, მედიის ცნობით, ახალ სატელევიზიო დრამაში, „Day 1s“, აღმასრულებელი პროდიუსერის ფუნქციას შეასრულებს და ეკრანზეც გამოჩნდება.
სერიალის სიუჟეტი ბრიტანული ფეხბურთის ინდუსტრიასა და სპორტული აგენტების საქმიანობას შეეხება. მთავარი პერსონაჟი გამოგონილი საფეხბურთო აგენტი სტენლი დალტონია, რომლის როლსაც ბრიტანელი მსახიობი დემიენ ლუისი შეასრულებს. პროექტის იდეა საფეხბურთო აგენტ დარენ დინს ეკუთვნის.
გავრცელებული ინფორმაციით, სერიალში ასევე გამოჩნდებიან საფრანგეთის ნაკრების ყოფილი ფეხბურთელი ტიერი ანრი, ბრიტანელი მუსიკოსი დეივი და მსახიობი კარლოტა ბანატი. გადაღებები ლონდონში, მათ შორის საფეხბურთო კლუბ „ბარნეტის“ სტადიონზე უკვე დაიწყო.
„Day 1s“ რონალდუსა და რეჟისორ მეთიუ ვონის ერთობლივი სტუდიის, UR•Marv-ის პირველი სატელევიზიო პროექტი იქნება. რონალდუმ და ვონმა დამოუკიდებელი კინოსტუდიის შექმნა 2025 წლის აპრილში გამოაცხადეს. იმ დროისთვის პარტნიორებს ორი სამოქმედო ფილმი უკვე დასრულებული ჰქონდათ, ხოლო მესამე პროექტზე მუშაობდნენ.
სერიალის პრემიერის თარიღი, სადისტრიბუციო პლატფორმა და რონალდუს ეკრანული როლის მასშტაბი ამ ეტაპზე ცნობილი არ არის. პროექტის შესახებ ინფორმაცია ოფიციალურად ჯერ არ დაუდასტურებიათ.
წყაროები:
The Sun:
https://www.thesun.co.uk/sport/39877721/cristiano-ronaldo-drama-uk-football/
Deadline:
https://deadline.com/2026/07/cristiano-ronaldo-drama-damian-lewis-matthew-vaughn-1237004249/
Fox Sports:
https://www.foxsports.com/stories/soccer/cristiano-ronaldo-produce-star-soccer-drama-series
Variety:
https://au.variety.com/2025/film/news/cristiano-ronaldo-matthew-vaughn-film-studio-urmarv-21563/
