მსოფლიოს წამყვან ეკონომიკებში საპროცენტო განაკვეთების სწრაფი შემცირების მოლოდინი კვლავ გადაიდო. აშშ-ში ინფლაციის ზრდამ და ევროპის ცენტრალური ბანკის გადაწყვეტილებამ აჩვენა, რომ ძვირი ფულის პერიოდი შესაძლოა მოსალოდნელზე დიდხანს გაგრძელდეს.
Galt & Taggart-ის ანგარიშის მიხედვით, აშშ-ის ფედერალურმა რეზერვმა განაკვეთი 3.50-3.75%-იან დიაპაზონში შეინარჩუნა. ამავე დროს, ინფლაციის პროგნოზი გაიზარდა, ეკონომიკური ზრდის პროგნოზი კი შემცირდა.
მაისში აშშ-ის წლიურმა ინფლაციამ 4.2%-ს მიაღწია — ეს 2023 წლის აპრილის შემდეგ ყველაზე მაღალი მაჩვენებელი იყო. ივნისში, ნავთობის გაიაფების შემდეგ, ინფლაცია 3.5%-მდე შემცირდა, თუმცა მაჩვენებელი კვლავ საკმარისად მაღალი დარჩა იმისთვის, რომ მონეტარული პოლიტიკის სწრაფი შერბილება გართულდეს.
ევროპის ცენტრალურმა ბანკმა ივნისში განაკვეთი 2%-დან 2.25%-მდე გაზარდა. ეს ბოლო სამი წლის განმავლობაში პირველი ზრდა იყო. ბაზარი წლის ბოლომდე კიდევ ერთ მატებას ვარაუდობს.
ანგარიშში წარმოდგენილი პროგნოზით, აშშ-ის ორწლიანი სახაზინო ობლიგაციების სარგებელი 2026 წლის მესამე კვარტალში 3.99%-მდე გაიზრდება, ხოლო ათწლიანი ობლიგაციების — 4.44%-მდე. 2027 წლის შუა პერიოდისთვის ორწლიანი სარგებელი 3.76%-მდე, ათწლიანი კი დაახლოებით 4.35%-მდე შემცირდება.
ევროპაში ათწლიანი გერმანული ობლიგაციის სარგებელი დაახლოებით 3%-თან შენარჩუნდება, EURIBOR კი წლის ბოლომდე 2.47-2.48%-მდე გაიზრდება.
მაღალი განაკვეთები ეკონომიკის თითქმის ყველა სექტორზე მოქმედებს. ძვირდება იპოთეკური და სამომხმარებლო სესხები, იზრდება კორპორაციული ვალის მომსახურების ხარჯი და რთულდება ახალი საინვესტიციო პროექტების დაფინანსება.
განსაკუთრებით მოწყვლადი არიან მაღალი ვალის მქონე კომპანიები, კომერციული უძრავი ქონება, სტარტაპები და ქვეყნები, რომლებსაც საერთაშორისო ვალუტაში დიდი ვალდებულებები აქვთ.
ამ გარემოში მოკლევადიანი ობლიგაციები გრძელვადიან ფასიან ქაღალდებთან შედარებით ნაკლებ საპროცენტო რისკს ატარებს. გრძელვადიანი ობლიგაციების ფასები კი ზეწოლის ქვეშ რჩება, ვიდრე ბაზარზე განაკვეთის კიდევ ერთი ზრდის მოლოდინი არსებობს.
