რიადის ოფიციალურმა პირებმა „ხედვა 2030-ის“ - მეფისნაცვალ მუჰამედ ბინ სალმანის ეკონომიკური და სოციალური ტრანსფორმაციის მრავალ ტრილიონ დოლარიანი გეგმის განხორციელებისთვის ჩინეთს შეუცვლელი პარტნიორი უწოდეს. კერძოდ, არაერთმა ჩინურმა კომპანიამ ჩადო ინვესტიცია ფუტურისტული ქალაქ NEOM-ის ასაშენებლად. ამის შესახებ Bloomberg წერს.
„ერთ-ერთი გარიგება, რომელსაც შეიძლება მალე გაფორმდეს, სათესლე გიგანტ Syngenta Group-ში $9 მილიარდის აქციების ინვესტიციას უკავშირდება. სახელმწიფო კომპანიის მრჩევლები მოლაპარაკებებს აწარმოებენ ახლო აღმოსავლეთის სუვერენულ ფონდებთან, მათ შორის აბუ დაბის საინვესტიციო ორგანოსთან და საუდის არაბეთის სუვერენულ საინვესტიციო ფონდთან, რომ მთავარი ინვესტორები გახდნენ.
აღნიშნულია, რომ ურთიერთობა ასევე სცილდება ეკონომიკურ ჩარჩოებს. დეკემბერში გამართულ სამიტზე, ჩინეთის პრეზიდენტმა სი ძინპინმა შუამავლობა შესთავაზა მოლაპარაკებებში ირანსა და საუდის არაბეთს, რამაც ხელი შეუწყო მარტში პეკინში საეტაპო შეთანხმებას მეტოქეებს შორის კავშირების განახლებისთვის.
გამოცემა წერს, რომ ვაშინგტონში შეშფოთებას გამოთქვამენ იმის გამო, რომ ჩინეთის მზარდი გავლენა ახლო აღმოსავლეთში, გრძელვადიან პერსპექტივაში, აშშ-ს ინტერესებს შესაძლოა დაუპირისპირდეს.
