ამერიკის შეერთებულმა შტატებმა 2026 წლიდან სავიზო ლატარიის H-1B–ის წესების გადახედვის შესახებ განაცხადა, – წერს Associated Press.
„H-1B ვიზების განაცხადების ამჟამინდელი შემთხვევითი შერჩევის მექანიზმი ბოროტად გამოიყენება აშშ-ის დამსაქმებლების მიერ, რომლებიც ძირითადად ცდილობენ უცხოელი მუშაკების მოზიდვას უფრო დაბალი ხელფასით, ვიდრე აშშ-ის მოქალაქეებს გადაუხდიდნენ“, - განაცხადა მეთიუ ტრაგესერმა, აშშ-ის მოქალაქეობისა და იმიგრაციის სამსახურის წარმომადგენელმა.
შინაგან საქმეთა დეპარტამენტის განცხადებაში აღნიშნულია, რომ ახალი წესი „შეესაბამება ადმინისტრაციის მიერ განხორციელებულ სხვა საკვანძო ცვლილებებს, კერძოდ პრეზიდენტის დეკლარაციას, რაც დამსაქმებლებისგან მოითხოვს, რომ პროგრამაში დაშვების პირობის სახით თითოეული ვიზისთვის დამატებით 100 000 აშშ დოლარი გადაიხადონ.
ისტორიულად, H-1B ვიზები ლატარიის მეშვეობით გაიცემოდა. ყოველწლიურად აშშ 65 000-მდე ახალ H-1B ვიზას გასცემს, დამატებით 20 000 კი მაგისტრის ხარისხის ან უმაღლესი განათლების მქონე აპლიკანტებისთვისაა ხელმისაწვდომი.
წელს, ამ ვიზების ყველაზე დიდი მიმღები Amazon იყო, 10 000-ზე მეტი დამტკიცებით. მას მოჰყვა Tata Consultancy Services, Microsoft, Apple და Google. H-1B ვიზების მუშაკების ყველაზე დიდი კონცენტრაცია კალიფორნიის შტატშია.
უწყების ცნობით, ახალი სისტემა „დანერგავს შეწონილი შერჩევის მექანიზმს, რომელიც გაზრდის იმის ალბათობას, რომ H-1B ვიზები მიენიჭებათ უფრო კვალიფიციურ და მაღალანაზღაურებად“ უცხოელ სპეციალისტებს. ის ძალაში შევა 2026 წლის 27 თებერვალს და გავრცელდება მომავალ რეგისტრაციის სეზონზე წლიური H-1B კვოტის ფარგლებში.
განახლებული მოდელის მიხედვით, რეგისტრაციები აღარ იქნება შემთხვევითი შერჩევის გზით შერჩეული. ამის ნაცვლად, ისინი შეწონილი იქნება დამსაქმებლისა და ხელფასის დონის მიხედვით – ამ მიდგომამ უნდა შეაფერხოს განაცხადების დუბლირება და სისტემური მანიპულირება. განაცხადებს, რომლებსაც უფრო მაღალი ხელფასი აქვთ შემოთავაზებული, შერჩევის გაცილებით მეტი შანსი ექნებათ, ხოლო დაბალანაზღაურებადი პოზიციები კვლავაც მისაღები იქნება, თუმცა ვიზის მიღების უფრო დაბალი ალბათობით.
