აშშ-მა მსოფლიო ჩემპიონატის მონაწილე ქვეყნების გულშემატკივრებისთვის სავიზო დეპოზიტის მოთხოვნა გააუქმა, - ინფორმაციას Associated Press-ი სახელმწიფო დეპარტამენტზე დაყრდნობით ავრცელებს.
აშშ-ის სახელმწიფო დეპარტამენტის ცნობით, სავიზო დეპოზიტის გადახდა არ მოუწევთ 2026 წლის მსოფლიო ჩემპიონატის მონაწილე ეროვნული ნაკრებების იმ გულშემატკივრებს, რომლებმაც ბილეთები უკვე შეიძინეს
და FIFA PASS-ში 2026 წლის 15 აპრილამდე დარეგისტრირდნენ.
„ჩვენ ვაუქმებთ სავიზო დეპოზიტს იმ კვალიფიცირებული გულშემატკივრებისთვის, რომლებმაც მსოფლიო ჩემპიონატის ბილეთები შეიძინეს“, - განაცხადა აშშ-ის სახელმწიფო მდივნის თანაშემწემ საკონსულო საკითხებში მორა ნამდარმა.
ასევე, სავიზო დეპოზიტის მოთხოვნა გაუქმდა ეროვნული ნაკრებების ფეხბურთელების, მწვრთნელებისთვის, დამხმარე პერსონალისთვის და მათი ახლობლებისთვის.
აშშ-ის სავიზო დეპოზიტის პროგრამაში, რომელიც 15000 დოლარამდე ოდენობის დეპოზიტის გადახდას ითვალისწინებს, 50 ქვეყანა შედის.
პროგრამაში მსოფლიო ჩემპიონატის მონაწილე 5 ქვეყანაა, რომლებიც სავიზო დეპოზიტისგან გათავისუფლდებიან, კერძოდ, ალჟირი, კაბო-ვერდე, კოტ-დ’ივუარი, სენეგალი და ტუნისი.
