გამყვან ტურებზე მოთხოვნა მატულობს. მიუხედავად იმისა, რომ მომსახურების ტარიფი თითქმის ყველა ქვეყანაში გაზრდილია და იაფი დასვენების შესაძლებლობა ხალხს ფაქტობრივად არ აქვს, ტურისტული აქტივობისთვის ამ ფაქტორს გავლენა არ მოუხდენია. ქართველი დამსვენებლები დღეისათვის ქართველი ტურისტებისთვის ზაფხულის სეზონზე ნომერ პირველ მიმართულებად თურქეთი რჩება. როგორც ტურისტულ კომპანიებში აცხადებენ, წინა წელთან შედარებით, მოთხოვნა გაზრდილია და ეს დინამიკა სეზონის ბოლომდე შენარჩუნდება.
კერძოდ, როგორც გამყვანი ტურიზმის ასოციაციის თანადამფუძნებელი, კომპანია "კლარკ&რობინსონის" ხელმძღვანელი მამუკა კელაურაძე აცხადებს, თურქეთის წილი სხვა ქვეყნებთან შედარებით, დაახლოებით 70%-მდეა. მთავარ ფაქტორად, რის გამოც დამსვენებლები უპირატესობას თურქეთს ანიჭებენ, მისივე თქმით, ხელმისაწვდომი ფასი (ავიაბილეთი, სასტუმრო) და მომსახურების ხარისხია.
,,ყველა ქვეყნის მიმართ ინტერესი გაზრდილია, თუმცა თურქეთი შარშან პირველ ადგილს იკავებდა და ეს მოცემულობა წელსაც შენარჩუნდა. ამას ხელს უწყობს ხელმისაწვდომი ტარიფები და ხარისხიანი მომსახურების შესაძლებლობა. თურქეთის კურორტებს მიმართულებით პირდაპირი რეისები არის როგორც ანტალიაზე, იზმირზე, ისე ბოდრუმზე. თუმცა წელს თურქეთში დასვენება ძალიან გაძვირებულია. გაზრდილია როგორც სასტუმროების, ასევე ავიაბილეთების ფასები. სხვაობა შარშანდელთან შედარებით დიდ განსხვავებას გვაძლევს, მაგრამ მოთხოვნა მაინც აქტიურია. შესაბამისად, რეისები ყველა მიმართულებით დატვირთულია. ხოლო თავად თურქეთში სასტუმროები საკმაოდ დატვირთულია", აღნიშნა მამუკა კელაურაძემ.
მისივე ინფორმაციით, საბერძნეთი რიგით მეორე ქვეყანაა, სადაც ქართველი ტურისტები ზაფხულში ყველაზე მეტად ისვენებენ. ასევე მაღალია მოთხოვნა ხორვატიასა და მონტენეგროზე, სადაც კარგი ზღვაა.
„ზოგადი ტენდენცია მსოფლიოს მასშტაბით არის ის, რომ წლიდან წლამდე სერვისები ძვირდება. ეს არამარტო კურორტებს ეხება, არამედ დიდ ქალაქებსაც. მაგალითად პარიზი, რომი, ლონდონი და ასე შემდეგ, ყველგან ფასები მატულობს და რადგანაც საფრანგეთი, იტალია, ბრიტანეთი ტურიზმის მოდის კანონმდებლები არიან, ეს ავტომატურად იწვევს იმას, რომ სხვა ქვეყნებშიც ფასები იზრდება. მოგზაურების უმეტესობა ძირითადად გამყვანი ტურებით სარგებლობს. რაც შეეხება დასვენების საფასურს, მაგალითად, თურქეთთან შედარებით, სამმავარსკვლავიან სასტუმროები იქ უკეთესადაა მოწყობილი, თუმცა 4-5-ვარსკვლავიანებზე ჩვები ფასები გაცილებით მიმზიდველი. პროცენტულად ვერ გეტყვით, თუმცა მოთხოვნა ყველა მიმართულენაზე გაზრდილია, გნებავთ კორპორატიული თუ ინდივიდუალური კლიენტებისთვის, ფასები მთელ მსოფლიოსი იზრდება. ამას ემატება ქალაქების მოსაკრებელი, მაგალითად, ევროპაში 10 დღით თუ მიდის დამსვენებელი, 40 ევრომდე ქალაქის მოსაკრებლის გადახდა უწევს. ფასები ზრდადია და ამას უნდა შევეგუოთ, მთავარია, შემოსავლები ჰქონდეს მოსახლეობას და იმოგზაუროს, დაბალი ფასები გამორიცხულია, ინფლაცია ემატება, გეოპოლიტიკური ვითარება, უკრაინაში შექმნილი მდგომარეობა და სხვა. ხარისხიანად და კარგად დასვენება ვისაც სურს, ძვირი სიამოვნებაა", - აღნიშნა მამუკა კელაურაძემ ,,რეზონანსთან" საუბრისას.
კიდევ ერთი ტენდენცია, რაზეც ტუროპერატორები ყურადღებას ამახვილებენ, დაბალბიუჯეტური ტურების ნაკლებობაა, ვინაიდან დამსვენებლების უმეტესობა მოგზაურობას დამოუკიდებლად გეგმავს.
გამყვანი ტურიზმის კიდევ ერთი წარმომადგენელი, ნატალია კოხრეიძე აღნიშნავს, რომ გამყვანი ტურიზმი, როგორც მიმართულება, ნელ-ნელა იმკვიდრებს ფეხს, ამიტომ არის გარკვეული პრობლემა, განსაკუთრებით დაბალბიუჯეტურ ტურებთან დაკავშირებით, რაც სავარაუდოდ ეტაპობრივად დაიხვეწება.
,,საქართველოში გამყვანი ტურიზმი ფაქტობრივად ახლა იწყებს განვითარებას, აქამდე მთელი ყურადღება შემომყვან ტურიზმზე იყო მიმართული, რაც ერთ-ერთი მნიშვნელოვანი პრიორიტეტია. გამყვანი ტურიზმის ფარგლებში, ვცდილობთ, დაინტერესებულ პირებს შევთავაზოთ მრავალფეროვანი ტურები მსოფლიოს ნებისმიერ ქვეყანაში. ბოლო წლების განმავლობაში შეიცვალა მომხმარებლის ქცევა და დაბალბიუჯეტური ტურები უმეტესად დამოუკიდებლად იგეგმება, რის გამოც ეს სეგმენტი ტურისტულ კომპანიებს მოაკლდა. მგზავრების უმეტესობა ცდილობს, თვითონ შეძლოს და დააკომპლექტოს საკუთარი მოგზაურობა. ბილეთები იყიდოს საიტზე და ადგილებიც დაჯავშნოს. ამან შეიძლება გაუთვალისწინებელი პრობლემა გამოიწვიოს, არასწორად იქნას ადგილი დაჯავშნილი, განთავსების პრობლემა შეიქმნას და სხვა, რაც დისკომფორტს იწვევს, განსხვავებით საშუალო და მაღალბიუჯეტური ტურებისგან, ეს სეგმენტი ძირითადად ტურისტული კომპანიების მომხმარებლები არიან მათ შემთხვევაში პრობლემატური საკითხები ფაქტობრივად არ არის", - უთხრა კოხრეიძემ ,,რეზონანსს".
რაც შეეხება საქართველოს, აღსანიშნავია, რომ მოგზაურთა საერთაშორისო პლატფორმაზე 2025 წლისთვის დაჯავშნილ ყველაზე პოპულარულ სამოგზაურო ტურებს შორის საქართველოც მოხვდა. 5-დღიანი ტური, რომელიც თბილისის, სიღნაღის, სტეფანწმინდისა და თრუსოს ხეობის მონახულებას ითვალისწინებს, Flash Pack-ზე რიგით მე-9 ყველაზე პოპულარულია.
2025 წლისთვის დაჯავშნილ ყველაზე პოპულარულ ტურებში ასევე მოხვდნენ: შრი-ლანკა, იაპონია, ფინეთი, კალიმანტანი (ბორნეო), ტაილანდი, ფილიპინები, კოსტა-რიკა, გვატემალა, საქართველო და ახალი ზელანდია.
