Airbnb Inc. დატვირთული სამოგზაურო სეზონის წინ, სტუმრებსა და მასპინძლებს შორის დაძაბულობის განმუხტვის მიზნით, პლატფორმაზე ბევრ სიახლეს ნერგავს. ამ ცვლილებებმა ფასები უფრო გამჭვირვალე უნდა გახადოს. ამის შესახებ Bloomberg წერს.
კომპანია ავრცელებს ორმოცდაათზე მეტ ახალ ფუნქციას და განახლებას, რომლებიც შექმნილია ფასების, გადახდის პროცედურების, ხელმისაწვდომობისა და სხვა გამჭვირვალობის გაზრდის მიზნით.
ცვლილებები მომხმარებელთა მილიონობით შეკითხვის, ათიათასობით სოციალური მედიის პოსტისა და ასობით ათას მასპინძელთან და სტუმართან საუბრის შემდეგ განხორციელდა.
„ჩვენ ნამდვილად შევამჩნიეთ, რომ ადამიანებს ვკარგავთ”, - განაცხადა კომპანიის აღმასრულებელმა დირექტორმა ბრაიან ჩესკიმ.
ფასების უფრო გამჭვირვალე და გასაგები რომ გახდეს, Airbnb-მა შეიმუშავა სისტემა, რომელიც სტუმრებს საშუალებას აძლევს, ყველა გადასახადის მთლიან ფასს გაეცნოს.
მასპინძლები ასევე მიიღებენ ახალ ინსტრუმენტებს კონკურენტული ფასების დასაწესებლად, ფასდაკლებების დასამატებლად და თავიანთი განცხადებების შესადარებლად რეგიონის ფასებთან. მათ შეუძლიათ ნახონ აპში ერთი ღამის საერთო ფასი, რათა მათ ყოველთვის იცოდნენ რამდენს იხდიან სტუმრები.
Airbnb ახორციელებს უამრავ ცვლილებას, მათ შორის საკომისიოს შემცირებას, განვადებით გადახდის ვარიანტების დამატებას და ახალი მასპინძლის ფასდაკლების ინსტრუმენტს.
ახალგაზრდა მოგზაურების მოზიდვის მიზნით, Airbnb Airbnb Rooms-ს აბრუნებს. ამ კატეგორიაში იქნება 1 მილიონზე მეტი განცხადება, რომელთა საშუალო ღირებულება 67 აშშ დოლარი იქნება ღამეში, სადაც სტუმრები თავიანთ მასპინძლებთან ერთად, საერთო ფართში, დარჩებიან.
ჩესკიმ აღნიშნა, რომ Airbnb ხელოვნური ინტელექტის ტექნოლოგიის გამოყენების გზებსაც იკვლევს.
Airbnb-ს ახლა ჰყავს 4 მილიონზე მეტი მასპინძელი, რომელიც 1,4 მილიარდ სტუმარს მასპინძლობს სახლებში, დაწყებული ხის სახლებიდან, დამთავრებული - სასახლეებით მთელ მსოფლიოში. მოსალოდნელია, რომ წელს 300 მილიონზე მეტი სტუმარი ეწვევა Airbnb-ს.
კომპანიის ვებსაიტის ინფორმაციით, 2022 წლის მესამე კვარტალში, გაქირავების პლატფორმა Airbnb-ის შემოსავალმა $2,88 მილიარდს მიაღწია. მკაცრი შეზღუდვების მოხსნა დაეხმარა კომპანიას ასეთი შედეგების მიღწევაში - ხალხი ისევ მოგზაურობს, აღნიშნა Airbnb-მ.
